Rev Kuki Aloalii failauga o le Tama Tane Malosi i le po o le aso Faraile

Rev Kuki Aloalii failauga o le Tama Tane Malosi i le po o le aso Faraile

O le fesili o loo tulai mai pea i totonu o le polokalame a le Tama Tane Malosi, o faataunuuina pea poo faatinoina tiute tauave o tama i totonu o aiga ma ekalesia? Afai e ioe poo le leai foi, o le auga tonu lea o le fagufagu a le polokalame o le Tama Tane Malosi o loo faatinoina i tausaga taitasi o le taumafai lea e momoli atu se feau taua ao se feau foi o le talalelei i tama ua avea ma ulu i totonu o aiga ina ia faataunuuina o latou tiute ma galuega e pei ona valaauina ai i latou e le Atua i totonu o aiga ma ekalesia.

E fitu ni folafolaga o loo avea ma manulauti i le polokalame a le Tama Tane Malosi e unaia ai pea tama i le faatinoina o latou tiute, ma o nei folafolaga sa fai ma taimuaga o le polokalame a le Tama Tane Malosi i lenei tausaga e pei ona faatinoina i le malumalu o le ekalesia Samoa Evangelism Ministry i Magele i le faaiuga o le vaiaso. (1) Ia faasilisili le Atua, (2) Ia fai uso (3) E ola faapaiaina, amiotonu amio mama i le va feagai ai ma tamaitai, (4) Atinae ulugalii ia malolosi ma aiga ia mautu, (5) Lagolago malosi le misiona a le ekalesia, (6) ia talepeina aupa o le faailoga lanu ma le faailoga lotu (7) ia faataunuuina poloaiga a Iesu Keriso i le faaevagelia. O nei folafolaga uma sa faamanino lelei e le susuga i le faafeagaiga ia Tavale Mataia i le po o le aso Faraile na amata aloia ai le tatalaina o lenei faamoemoe o le Tama Tane Malosi i lenei tausaga.

E molimau eseese lava tausaga taitasi, aua o le fitu nei o tausaga talu ona faatinoina lenei polokalame i totonu o Niu Sila. I tausaga ua mavae o le tele lava o le suiga o nei polokalame i tama o le latou tiute faatino i totonu o ekalesia e pei ona lipotia mai e latou faifeau o loo galulue ai ma lolotu ai, ua silasila a latou faifeau ua iai le suiga o le soifua galulue i totonu o lotu aemaise foi i fanau talavou tama, o le taliotonuga foi la o faifeau o le suiga o loo i totonu o ekalesia o le suiga foi lea o loo faatinoina i totonu o aiga, ma o se agaga faafetai lea i le Atua i lenei polokalame o loo mafai ona fua mai ni fua lelei i tama o loo auai ma faalogologo i le upu a le Atua. O le tele o faifeau o ekalesia o loo auai i totonu o le komiti faafoe o le tapenaina o le Tama Tane Malosi ma o le latou foi lea matafaioi o le unaia o tama i totonu o lenei polokalame ina ia faamalosia ai lo latou soifua galulue ma faatinoina o latou tiute i totonu o aiga ma ekalesia ma ia ola faapaiaina tama uma.

O le sini autu o le Tama Tane Malosi i lenei tausaga “O le ola faitaulaga e totogi le tau” o le autu ua filifilia e tatai uma iai lagona o tama sa auai ao folafola e le aufaigaluega a le Atua le upu faauuina a le Atua e pei ona tatala aloia ai e le susuga i le faafeagaiga ia Pastor Kuki Aloalii i le po o le aso Faraile.

Susuga i faafeagaiga o loo faatinoina le Tama Tane Malosi

Susuga i faafeagaiga o loo faatinoina le Tama Tane Malosi

O aitema foi na momoli ai le isi vaega o le feau a le Atua na saunia lea e alo ma fanau tupulaga tama lalovaoa o le ekalesia S.A.O.G, faatasi ai ma le tautinoga ola a le susuga i le alii faipisini ia Sala George Lutu, lea na ia molimau ai i le lelei o le Atua i lona aiga ao tau amata ai i totonu o Niu Sila.

E lei faigofie lona saili i le Atua Iise manuia o lona aiga, sa ia talatala i le faigata o lona aiga sa iai i Samoa ao nonofo ai i le faleoo sa faafailele mai ai lona olaga, ma lona le iloa e iai polokalame a le Atua i lona soifua e manuia ai lona aiga. Na ola a’e e le iloa se mea e tasi i le aoga ae o lona le iloa o se mea ma lona vaivai sa le gata ai iina lona taumafai ma lona faalagolago i le Atua. Na malaga mai i Niu Sila ma tau amata le aiga ma sa fai i le Atua e fia uu i lona lima se $500.00 ma se $1000.00 pe faapei lona mamafa. Sa tatalo foi i le Atua afai e iai se galuega e aoga ai Niu Sila e manuia ai lona aiga ona fesoasoani mai lea i lona vaivai ae afai e leai ona toe faafoi lea o ia i Samoa.

Peitai e faafofoga le Atua i le tagi o lana fanau ma le faamaoni, ma o lea sa maua ai lana galuuega o le faimoega, ma o le galuega lea sa faamaoni ai lava ma iu ai ina ave ana aoga i le suiga o moega ma le faiga o faamalu. Aluai aluai le olaga ua iu lava ina iloa fai mea uma i totonu o le kamupani ma tau amata loa lana pisinisi i totonu o lona faletaavale, seia oo mai i le taimi nei, ua siitia e le Atua le tulaga o le kamupani ma ua faalautele foi e le Atua le faleie o le galuega lea ua faaigoaina ai i le taimi nei o le Sleep Well NZ, ua iai le lala i Samoa ao lea foi ua tau amata le isi lala fou i Saina. O le molimau a Lutu o le faamaoni ma le faamuamua o le Atua i mea uma o le faailoga sili lea ona taua i le tagata.

O le aso Toonai na faauauina ai polokalame o le Tama Tane Malosi ma sa tatala foi i le viiga faafetai i le Atua ona sosoo lea ma nisi o faatalatalanoaga (workshops) e talanoaina ai tiute ma galuega a le tama e tatau ona fai, aemaise ai o le faasoa mai o faifeau i le upu a le Atua e faavae ai pea le olaga o le tama i totonu o lona aiga ma le ekalesia. Na iai taimi na fai ai iputi ma tatala le avanoa e faafesoaai ai tama ma taualauga ai loa i le aitema a le ekalesia o le Word of Life i Otahuhu ma tapunia aloaia ai loa le polokalame a le Tama Tane Malosi i lenei tausaga 2018.

Tama sa auai i le polokalame Tama Tane Malosi

Tama sa auai i le polokalame Tama Tane Malosi