O le faaiuga o le vaiaso na faamavae atu ai le aiga ma uo a le alii na galue i le kamupani vaa a le Pasefika le PFL lea na maliu i le faaiuga o le vaiaso na tea nei ina ua tanumia i se pusa o uta o oloa i le uafu i Matautu.
Ae o le faaiuga foi o le vaiaso, na taloina ai se fonotaga i le va o le Pulega o Uafu ma Taulaga i Apia nei ma le Kamupani Vaa o le Pacific Forum Line – le PFL ona o le faalavelave lea na tulai mai ma maliu ai se alii talavou o le afioaga o Salua Manono ma Magiagi.
O lē ua maliu, e suafa ia Ropati Nuupule o Manono ua tolu tausaga o galue i le Kamupani vaa o le PFL, ma o se alii e lei leva ona fai lona aiga ma e mau paolo i le afioaga o Magiagi ma tau savali ai i lana galuega.
O ona tiute o le faamauina lea o pusa tetele o loo teu ai uta mai i vaa la‘u oloa agai i le uafu.
O ā lava la faigamalaga o vaa tetele nei o loo auina mai ai pusa o uta tetele a le PFL, o ia ma nisi o le aufaigaluega e agai i le uafu ma faamauina uta o loo auina mai i fafo.
E ta‘u le latou galuega o le ‘au tally.
E pei ona ta‘ua e lei leva ona iai si alii lenei i lana galuega ae e matuā faateia si ona toalua ma lona aiga ina ua oo atu le lipoti i le Aso Toonai ua uma le ola o Nuupule ona o se faalavelave matuia ua tulai mai ua tanumia ai i se tasi o pusa tetele lenei o uta o oloa mai i fafo.
E na o le fa masina le matua o si o la alo ma lona toalua i Magiagi ae o lea ua motusia faafuasei le mafutaga ona o le faalavelave na tulai mai. Ua tele le mau faamatalaga i le auala na maliu ai lenei alii ae o se faatalatalanoaga ma le Alii Pule o le Pulega o Uafu faapea ai Taulaga le afioga Taulapapa Maselino Tomeniko, e iai lava avanoa e tulai mai ai faalavelave ma e maualuga lava le manatu i le malamalama o tagata uma i galuega ma le saogalemu e tatau ona iai pe a galulue i luga o uafu aemaise i taimi e taula ai se vaa la‘u oloa ma ua felauai uta tetele faapenei.
“E malosi tulafono ma aiaiga o le faatinoga o le galuega ma e tatau lava ona malosi ona o galuega nei e lē faigofie ma e faigofie ona tutupu faalavelave ma manunu‘a pe maliliu ai foi nisi e galulue ai a o faatino galuega,” o se saunoaga lea a le afioga ia Taulapapa.
“O le faamatalaga ua oo mai, e foliga mai na fai se malologa a lē ua maliu ma o le nofoaga foi lea na malolo ai e saoloto lava le felauaiga o uta tetele nei auā e lē masani ona malolo ai nisi.
E iai lava empty containers e tele ina tuu e le Pulega o le Uafu i vaega o le uafu e malu mai ai le aufaigaluega a le matou ofisa poo kamupani vaa e pei o le PFL i le aso ma e i le pito i luma le isi pusa ae e i tua o le uafu le isi pusa.
E mafai ona malolo i ai tama e faatino galuega nei ma o inā e iloa uma lava e afe ane i ai tama mo a latou malologa, ae o le nofoaga lea sa iai si taulealea lea e saoloto lava le feaveaiga o uta mo le teuina ai faavaitaimi a o la‘u mai isi uta mai i vaa la‘u oloa agai i le uafu”.
Faaalia e Taulapapa ai o le malologa la lea a lea taulealea ona ua oo atu lipoti sa galue i le aso o muamua atu, atonu o faatali ai le taimi e toe amata ai ae ua tanumia ai i le faagasologa ane o pusa na fuafua mo Tonga e teu ai ae se‘i la‘u mai pusa o uta mo Samoa lava ia.
O le toe aveesega la o pusa nei mo le faafoi ai i le faigamalaga fuafua mo Tonga ae maua ai loa le tino maliu o le alii e pei ona ta‘ua.
O se isi alii e galue ai i le Pulega o Uafu ma Taulaga na fai se telefoni i le va o pusa uta tetele nei, ma ia vaaia ai loa se isi o tanumia i lalo o se tasi o pusa nei ma valaau loa se fesoasoani. E masalomia o le lima i le vaveao (5am) na tupu ai le faalavelave ae e maua le tino o lea alii ua ‘afa le sefulu (10.30am).
E maua lava na ta‘ua e Taulapapa o loo i ona autafa le faila o loo iai le lisi o pusa nei o uta na galue ai lea alii a o lei faia lana malologa.
“O tulafono o la‘u lava aufaigaluega e taifā itula e galulue ai tallies a le Pulega o le Uafu lava ia. E mae‘a loa itula e fā ua tatau ona sui le sifi, sui mai isi tama faigaluega ae o lona uiga ua lē suia le sifi ae ua toe faatali si alii lea mo le faaauau ai o ana galuega, lea la ua tulai mai ai le faalavelave a o malolo,” o se masalosaloga lea o le Alii Pule. Na ia faaalia e tāua tele le lava o le malologa ma le malosi e faatino ai nei galuega auā o aiaiga o le faitauina ma le faamauina o uta nei, e tatau ona iai le tally a le Pulega o Uafu ma Taulaga, tatau foi ona iai le tally a soo se kamupani vaa o loo fia faamauina ana uta e auina mai i fafo.
O tagata ia e toalua e faatino uma lava le faamauina o nei uta a o lei talaia ma aveese oloa mai i ia pusa tetele.
“E tāua tele le saogalemu o tagata uma e galulue i nei nofoaga ma o le mafuaaga lava lea o le toe feiloai ina ia toe lapatai ma faamanatu pea le tāua o le saogalemu o tagata uma auā a toe tulai mai loa ni faalavelave faapenei, ua tatau lava foi la i le Pulega o Uafu ma Taulaga ona vaavaai pe lē ua talafeagai le faatino loa e tallys a le Pulega latou galuega nei auā o loo unai lava le saogalemu ma o loo faasoa lelei taimi e galulue ai tagata nei ina ia mautinoa le lava o le malologa ma le malosi e faatino ai ia galuega,” o se saunoaga lea a le alii Pule o Uafu ma Taulaga.
Faamatala e sui o le aiga o lenei alii e tele lava ina alu Nuupule e faigaluega e ta‘i lua i le tolu aso faato‘ā foi atu i le aiga. E uumi taimi e faigaluega ai.
O le tamaitai pule o le PFL o loo i atunuu mamao ae o le alii o loo tauaveina galuega a le pule i le taimi nei e lei maua ane lava se avanoa mo se faamatalaga e faatatau i lenei mataupu, ae o ā foi ni galuega e mafai ona faamalosia ai le saogalemu o tagata faigaluega i luga o le uafu.
