Faamalosia puipuiga o togatogo ma nofoaga faataufusi i le Pasefika

O le masina nei lea ua fuafua e mae‘a ai ona faamautu se fuafuaga ina ia faamalosia ai le puipuiga o nofoaga e pei o togatogo i totonu o le Pasefika.

O se fuafuaga na talanoaina i Samoa i lenei vaiaso i le nofoaga tutotonu o le Siosiomaga o le Itulagi o le Pasefika le SPREP i Vailima ma na auai mai i ai sui o atumotu ua mae‘a sainia le maliega ina ia faamalosia ai galuega e puipuia ai nei nofoaga tāua e aofia ai ma Samoa.

O le taimi lenei e na o le lima lava atunuu o le Pasefika ua sainia le feagaiga lea e ta‘ua o le Maliega o le Ramsar ma o atunuu ia e pei o Samoa, Fiti, le Atu Malesala, Palau ma Papua Niu Kini. Ua faalauiloa mai foi e Tonga, Niue ma Kilipati le manaoga e ofi mai i lenei feagaiga.

O le faamalosia o le iai o atumotu o le Pasefika i lenei feagaiga o le a maua ai ma le fesoasoani e ala mai i le SPREP ma ana paaga mai i fafo e faatino ai loa galuega laveai i le tele o nofoaga faataufusi ma togatogo e lē o toe iai se puipuiga i le taimi nei.

O Samoa ua tele galuega a le Matagaluega o Punaoa faalenatura ma le Siosiomaga e toe faamamā ma faaolaola lelei ai togatogo e pei ona iai faasao eseese i Sataoa ma Saanapu faapea ai nisi o nofoaga i le talafatai o le taulaga lea e tele ai nofoaga faapenei.

O nei faasao ua vaai ai lava e pulega o afioaga togatogo nei ma ua faamalosia ai tapu e pei o le soona fagotaina o ia nofoaga aemaise o le tulaga e pei ona iai le lafoai ai e le toatele o le otaota.
E lē tau faamatalaina le aogā tele o togatogo ma nofoaga faataufusi nei i le soifua manuia ai o tagata soifua o le Pasefika auā o se alaoa lea ua maua mai ai taumafa mai i le gataifale, ua tele le i‘a ma paa ua maua mai ai ma ua aogā tele foi togatogo i le faaaogāina mo meaafale ma galuega taulima o le sao o nuu taitasi o loo unaia i Samoa ina ia mafai ona faaauau ai le vaaiga o nei nofoaga tāua i tausaga e tele o lumanai.

Ua faapea foi ona vaaia le aogā tele i le tatali ai o le galu e ono faatamaia ai maota ma laoa o i latou o loo nonofo latalata ane i le sami e pei ona vaaia i afā ua tuanai atu.

O le fuafuaga ua faataatia nei, e mo le tausaga fou 2011 seia oo i le tausaga e 2013 ma o le feagaiga na sainia i le tausaga e 1999 ae o lea lava na o le lima atunuu o le Pasefika ua o latou sainia le faamalosiga o nei puipuiga. O lenei galuega tele ua faatino e Matagaluega o le Siosiomaga i totonu o le Pasefika faapea ai le SPREP ma ana paaga mai i fafo ia o loo aumai ai seleni e faatino ai e nuu taitasi nei faasao tāua.

O auala o puipuiga e pei ona vaaia i Sataoa ma Saanapu ua fuafua lelei ai lava pitonuu e mafai ona fagogota i lea taimi ma lea taimi i ia nofoaga ma o loo faagasolo asiasiga a nuu nei e lua i vaiaso uma ina ia mātauina ai le mamā ma le lalelei pea o nei nofoaga. Ua avea foi ma nofoaga ua agai i ai le tele o tagata tafafao maimoa mai fafo ma o se tupe maua faasili foi lea a afioaga nei pe a iai asiasiga faapea.