O le vaiaso na tea nei na amata ai ona vaaia le faamalosia e le Matagaluega o Leoleo o sā i le au faatau oloa i luma o faleoloa o le taulaga.
O se sā ua vaaia ai nei le tele o i latou sa fola a latou oloa amata mai lava i luma o le maota tele o le ACC seia oo ia i latou sa i luma ane o le faleoloa o Eveni (Carruthers).
O le faafitauli lenei ua tele tausaga o feagai ma i latou e vaaia le taulaga ma na amata mai lava i vaitau o le 1980 i lalo o pulu o le Eleele fou sa vaaia ai le tele o tamai faleoloa na faatutū solo i le Eleele fou.
Sa iu ina aveese ae agai i le nofoaga lea ua fausia ai nei le ACC ma na vaeluaina loa maketi o fua o faatoaga i Fugalei ma le maketi o oloa eseese i Savalalo ona o le toatele lava ua iai pisinisi laiti nei peitai e leai ni nofoaga e faamautu ai.
Ua mae‘a lea auaunaga peitai e lei aveesea ai lava le toatele e laina solo i luma o faleoloa ma a latou oloa faatau atu i le atunuu. O lea foi la ua toe faamalosia le tulafono ma ua faapea ona tutuli ese ai.
Se‘i vaganā lava faleoloa latou e avane i fafo a latou oloa o isi uma fai pisinisi ua faasala nei pe a maua o faaaogā luma o isi maota tetele o le malo poo isi faleoloa e faatau ai a latou oloa e pei o koko Samoa, o seevae, o matatioata, o elei ma le anoano o isi oloa.
O nisi foi ua iai a latou tagata faigaluega e faasavali le tele o oloa nei e faalauiloa i luga o auala savali o le taulaga ma ua tele faitioga i le tumutumu ai o nofoaga o loo ui ai le toatele o tagata faatau ma tagata asiasi mai.
O le faitioga a le au faioloa nei, ua mae‘a lelei lava ona totogi o latou laisene o ni pisinisi laiti ma e oo lava i le faatau savali o a latou oloa ua iai le laisene e faataga faatulafono ai a latou atinae ae o lea foi ua liliu mai le malo ma taofi a latou atinae.
O le taimi lenei ua talanoaina le tapuni o le maketi i Savalalo ma o le isi tumutumu lena o le a matuā lē iloa poo fea o le a agai i ai mo a latou atinae.
O Fugalei faatoa mae‘a i se taimi o le tausaga fou ma o lea ua fausia ai ma se nofoaga tele mo oloa a i latou nei e leai ni nofoaga mautu e faatau ai a latou oloa.
O loo tau saili lava foi se nofoaga mo le au fai faatoaga ia e agai solo e faatau a latou meamata e tālia ai le mae‘a o le maketi i Fugalei. Mo i latou ia ua tutuli ese ua agai solo nei i luma o le NPF Plaza ma a latou oloa ae o loo vaaia lava le tutuli ese i aso uma e malu o le malo.
