Faamalosia le faitautusi i aoga a le atunuu

Ua faamalosia e le Matagaluega o Aoga le itula e tasi o aso aoga uma, amata atu i le tausaga fou mo faitauga tusi. O se faiga na ta‘ua e le Ofisa Sili o le Matagaluega e foia ai le faaletonu o le faitautusi ma le poto salalau o iloa e fanau a le atunuu i lenei vaitaimi. O tausaga ua tuanai sa maualuga lava le iloa o tagata Samoa e amata mai i le fanau, i le faitautusi ma le tusitusi (literacy rate).
A faatusatusa i isi atunuu o le Pasefika, o Samoa le isi atunuu aupito maualuga le malamalama lautele a ona tagata. Peitai ua silia i le 10 tausaga ua maua i ripoti o le aotelega o suesuega a le lala o aoaoga a Malo Aufaatasi, le palasi i lalo o le malamalama lea.
O le tulai mai la o faitioga i le gagana e faaaogā i le faaaliga tausala o Samoa na laga ai foi se finagalo o le Ofisa Sili o Aoga. Ta‘ua e Matafeo, Falanaipupu Tanielu Aiafi o le faaletonu o le tali o fesili i le tauvaga tausala o se faailoga i le tulaga o iai aoaoga a fanau i lenei vaitaimi, aemaise lava la i le malamalama ai e ala i le poto salalau i mea o tutupu ma o loo faatāua foi i lenei vaitaimi i le atunuu.
Ta‘ua e le alii Ofisa Sili o le mafuaaga lava lea o le manatu ua tatau nei loa ona fai se faiga e tali atu ai i lea faafitauli ma ua faamalosia ai nei le itula lea e tasi i aso uma e faatautaia ai le faitautusi ma le tusitusi.
O lea foi ua ave le faamalosi i le silafia lautele o fanau ma e pau lava le galuega lea ua faatino i luga o televise i le atunuu o tauvaga sipela a fanau laiti lea e faatino e le TV3, tauvaga o le silafia i le poto salalau lea e faatino e le TVOne atoa ai le Rotaract lea e faaigoaina o le Taua o Mafaufauga.
O aoga o loo iai aso e ta‘ua o English Days ma Culture Days e unai ai le tomai i le Gagana Peretania e ala lea i tauvaga tala ma tauvaga solo faapea tauvaga lauga ae o le manao o le alii ofisa sili ia faia nei taumafaiga i aso uma, ona pau lava lea o le auala e vaaia ai se suiga i se taimi lata mai.
O nisi o finagalo ua faaalia i le pa‘ū o le tomai lea e faitautusi ma tusitusi (literacy) i Samoa ua tuuaia ai le lē toe malosi o aoga faifeau. E pei o le nofoaga lea na agai lava i ai fanau auā le tomai lea ma sa toatele lava foi na faamanuiaina ai. O le mau a le Matagaluega o se galuega fai faatasi ae ua tatau lava ona faamalosia i aoga a le Malo. O le itula e 9am – 10am i aso uma lea ua atofaina mo lea faamoemoe ma na ta‘ua e Matafeo o le a suesue lelei lava foi e ala i asiasiga le faatinoga e aoga o le faitautusi ma le taulai ia mae‘a le tausaga, ua vaaia le telē o se suiga i lea tulaga aemaise lava, o lea ua amata mai i vasega a fanau laiti.