O le tele o galuega a le Vaega faapitoa lenei o le Matagaluega o Leoleo ma Falepuipui, ua o latou vaavaaia ai le puipuiga o Samoa mai i solitulafono e ono ofi mai i atunuu mamao.
O lea galuega ua aveese ai lava lenei vaega faapitoa o alii ma tamaitai leoleo ua iai le tomai e faatinoina suesuega ma vaavaaiga faapea.
O atumotu o le Pasefika ua tele ina agai mai i ai nisi o tagata ma faalapotopotoga o tagata solitulafono ona o le manatu e le malosi puipuiga o atumotu laiti ma e mafai ona faaaoga atumotu laiti nei e ui mai ai laau malosi ma nisi auupega e le masani ona sao i nisi atunuu. E le gata i lea o fualaau faasaina e pei foi ona maua ai lava i nisi o atunuu.
E le gata i lea o loo ua tele foi ina faaaoga atunuu laiti nei ma nofoaga e teu faavaitaimi ai faaputugatupe a nisi o kamupani o loo alofia le totogi o lafoga i fafo, poo ni tupe ave faagaoi foi.
O le aofia foi o atumotu laiti i atinae tau i fesootaiga televavave ua vaaia ai foi le tele o soligatulafono i ia itu o fesootaiga ma o nisi ia o solitulafono ua moomia ai fesootaiga a leoleo o le itulagi.
O nisi nei o le mau solitulafono o loo nafa ma ia ofisa, aemaise foi le faaaoga o motu laiti o le itulagi e lalafi ai nisi o tagata o loo tuliloaina i soligatulafono ogaoga i totonu o o latou lava atunuu. O le tausaga e 2002 na faatuina ai loa le Puipuiga faavaomalo mo atunuu e 13 o le Pasefika. O Samoa nei na faavae atu ai lenei faalapotopotoga ma o loo aofia uma ai Matagaluega o Leoleo a atunuu uma nei e pei foi la ona iai le lala faapitoa lea a le Matagaluega o Leoleo ma Falepuipui a Samoa.
Talu ona faavae mai ua ta‘ua e le Matagaluega le tele o le sao i le taumafaiga a leoleo o Samoa nei aemaise foi leoleo a isi atunuu o le Pasefika ina ia saili tagata solitulafono ma fesoasoani le isi lala i le isi i suesuega o loo faatautaia faaleoleo.
O le vaiaso lenei na laasia ai e le Ofisa lenei i Samoa se isi laasaga i le faaleleia atili o lana foi auaunaga aemaise o fesootaiga ma ona lala i isi atunuu e 12 o le Pasefika.
O le upega tafailagi na tatala aloiaia i lenei vaiaso ua ta‘ua e le ofisa lenei le taua tele i le latou taumafaiga e maua fesootaiga televavave i le faatinoga o a latou galuega.
O le tuatusi o lenei upega tafailagi o le www.ptcn.ws ma ua iai le faamoemoe o le a tele se suiga i le faatinoga o galuega a lea Ofisa mai i le faamautu ai o lenei vaega o fesootaiga.
O le Komiti Faafoe o loo vaaia galuega a lala uma o Leoleo faavaomalo a le Pasefika o loo faauluulu i ai le Komesina o Leoleo a le Atu Solomona, o Walter Kola ma na ia faaalia le faafetai ua maua le fesootaiga tau tekonolosi e pei ona tatala i Samoa i lenei vaiaso ona o le faataua ua ave e lenei vaega o puipuiga a le Pasefika i le faatinoga o a latou galuega faaleoleo ma galuega tau suesuega.
Faaalia e lea taitai leoleo o le iai o fesootaiga nei o le a mafai ai ona manino lala o le puipuiga faavaomalo i le tulaga ua iai le faamalosia o le tulafono ma galuega faapuipuiga i Samoa, a o ā mai le tulaga o iai ana galuega, o aoaoga ma le atinae o leoleo faapea le tali a Samoa ma isi ona soatau i le itulagi, i soligatulafono ua amata nei ona vaaia i le Pasefika.