O faaupuga na lafo e le sui o le National (le tamaitai o Melissa Lee) faapea o tagata mai Aukilani i Saute o tagata solitulafono, o se faaupuga soona lafo, e leai se faamaoniga, ma e aliali ai lona vaivai ma le vaavaa o le vaega a le National.
O ituaiga faaupuga foi nei na soona lafo e le tamaitai o Jenny Shipley le faipule a le National, a o tulai mai i le tofi palemia o Niu Sila i le tausaga 1997 agai i le 1999, sa ia fai mai o tagata Pasefika ma tagata Maori o tagata e solitulafono. O le natura masani lava lea a le National, ma e aofia ma le faigamalo ua taitai nei e John Key.
E ui la ua uma ona faatoese le tamaitai Korea o Melissa Lee, ma ua talia lea faatoesega e le pulenuu o Manukau, le alii o Len Brown, ae ia te au lava ia, e le vave faagaloina le matuitui o nei faaupuga ma le loto tiga o le tele o tagata o loo afifio ma alaala i Aukilani i Saute ma Manukau.
Sa ou fesiligia le Malo i finauga sa faia i le maota fono o le Palemene ma ou fai atu i ai, “E pau lava tagata solitulafono lea ua manino nei, o le faigamalo a le National ma le ACT talu ai ua taumafai e unai le faaofi atu o le tulafono fou mo le faavaeina o le Super City i Aukilani, i se tulaga faanatinati e aunoa ma le tapa atu i se finagalo o tagata Aukilani, pe ioeina le Super City pe leai.
E le gata i lea, o uiga ua faaalia e le alii Palemia o John Key ma le Minisita o Faigamalo Laiti o Rodney Hide, ua ou faatusaina o ni tagata leaga ma le solitulafono ona o folafolaga a John Key ma Rodney Hide sa faapea atu i pulenuu o Manukau, Waitakere, Papakura, Franklin, North Shore, ma Rodney, o loo ia i latou le fuainumera o faipule e pasia ai le taufaaofi o le tulafono fou o le Super City i se tulaga faanatinati.
Ua ou faatusaina nei faiga e pei ua tuuina e le Malo se laau malosi i ao o pulenuu (sei tulou), aua ua le mafai ona toe tali atu i nei fuafuaga ua faamalosia e le faigamalo.
I taualumaga a le Palemene i le vaiaso ua tuanai na faamalosia ai le pasia o le tulafono muamua, ma ua faavae nei le Super City i Aukilani. Ua toe pasia foi e le faigamalo a le National se tulafono fou ua faaleaogaina ai faigamalo laiti o loo iai nei e pei o Manukau ma isi faigamalo laiti, ae o lea ua taloina e le Malo ni fonotaga e toe faatalanoa le mataupu o le Super City i Aukilani. E valu fonotaga o loo fuafua e faia i Aukilani tutotonu, ae na o le tasi lava le fonotaga mo Manukau, tasi mo Waitakere.
O le fesili sa ou tuiina ai le faigamalo, “O le a tonu le aoga o nei fonotaga ua toe taloina a o lea ua uma ona pasia faaletulafono le tulai mai o le Super City ma le faaleaogaina o faigamalo laiti e pei ona iai nei?
Ua aliali tonu i ia uiga e leai se alofa o le faigamalo a le National i tagata Manukau ma tagata Waitakere, faapea i latou o loo afifio i Papakura, Franklin, North Shore ma Rodney.
Ua aliali foi i nei faiga le faamaualuga ma le fia pulepule tutu e aunoa ma se tapa atu i ni finagalo o i latou o le a aafia i nei faiga ua faatino.
O le isi foi itu, ou te talitonu o lea ua faasolo le faatosina a le National mo le Pulenuu sili poo le Super Mayor mo le Super City fou i Aukilani, ma o le tagata o loo lagolago e le Malo o le alii o John Banks lea sa avea ma Minisita i le faigamalo a le National i le tausaga 1990 agai i le 1996.
Sa taumafai lava le Leipa ina ia taufaaofi teuteuga o le tulafono a le Malo ina ia latou talia ni sui a Maori, Pasefika ma Asia i le Super City fou. Peitai sa teena lava e le National ma le ACT ia teuteuga.
Sa matou taumafai foi e teuteu le tulafono a le Malo ina ia puipuia tagata faigaluega o loo faigaluega i faigamalo laiti i Aukilani, aua o lea ua faaleaogaina nei ia faigamalo i le tulai o le Super City, peitai na teena foi e le Malo.
Sa matou finau foi e teuteu le tulafono a le malo ina ia puipuia aseta o fanua, sea o le malae vaalele, ma le tele o isi aseta taua, ia aua nei faatauesea e le National, peitai ane ua teena foi e le Malo.
O le mea lea ou te lagolagoina ai le solo tetee poo le “Hikoi” o loo fuafua mo le Aso Gafua, aso 25 Me i le taulaga o Aukilani e faailoa ai i le faigamalo le sese o a latou fuafuaga.
Sa ou talosaga i le fonotaga a tagata Pasefika na faia i le aso 11 Me ina ia tatou lagolagoina le mau lea ua taulamua ai Maori, aua a le talia e le faigamalo a le National le mau a Maori, o le a faapena foi ona faigata ona talia o so tatou leo o tagata Pasefika.
Ou te talosagaina foi le mamalu o le tatou atunuu o loo afifio ma alaala i le itumalo o Mt Albert, o le Aso Toonai, le aso 13 o Iuni o le a faataunuu ai le faigapalota laititi e saili ai se faipule e suitulaga ia Helen Clark. O le sui ua tasi i ai le Leipa o le alii o David Shearer. E moni o oe lava e faia lau filifiliga, ae e manaomia lau fesoasoani i le faigapalota laititi o le a agai atu i ai Mt Albert.
