Ua mae‘a se a‘oa‘oga na faatautaia mo se vaiaso atoa i Apia e a‘oa‘o ai faalapotopotoga i totonu o afioaga, i auala e saili fesoasoani ai i faalapotopotoga i fafo.
O tausaga taitasi e iai fesoasoani e faaauala i faalapotopotoga mai i fafo e pei o le Iuni a Europa auā le tele o atinae i totonu o nuu ma afioaga.
O le faatinoga o nei atinae e tatau lava ona maua ai se manuia lautele o afioaga ma o latou tagata. Ua lua nei tausaga sosoo e pei ona ta‘ua e sui o le Faamalu o Faalapotopotoga Tumaoti (SUNGO) ma i latou o loo faatautaia mafutaga faaleaoaoga i Samoa, o toe foi le tele o le tupe e faamatuu mai e faalapotopotoga tetele nei mai i fafo, mo Samoa.
O le tausaga na te‘a nei e $1.5 miliona (tala) se tupe na toe foi lava i le Iuni a Europa ua lē faaaogāina talu ai e sese le faatinoga o talosaga a komiti, autalavou, mafutaga a aoga Aso Sa ma isi mau faalapotopotoga i totonu o nuu.
O aiaiga la o soo se talosaga ina ia talia ai ma faaaogā le seleni o loo aumai mo le atinae o nuu, lea ua faatino ai nei lea aoaoga ma ua faatupe lava e le Iuni a Europa lona faatinoga.
O le mataupu lenei na lāgā ai foi se faagaulemalie o le ta‘ita‘i o le Malo, le Alii Palemia i se feiloaiga ma Faalapotopotoga Tumaoti i le lua tausaga talu ai.
Ta‘ua e le alii Palemia e lē iloa pe aisea e saga faafaigata ai aiaiga o le talosaga atu o soo se faalapotopotoga tau atiae i nei seleni. Ta‘ua e le Alii Palemia, e maimau tele seleni nei e toe faafoi i tausaga taitasi ona o le lē vaavaai faalelei o i latou o loo ala mai ai fesoasoani nei i Samoa e faamalamalama i sui o komiti, autalavou, Aoga Aso Sa faapea afioaga eseese auala e talosaga ai.
O le aoaoga la lea na faatautaia i Apia na fesootai ai loa le SUNGO ma nisi o autalavou, ma Aoga Aso Sa, Komiti a nuu ma Mafutaga a Tina i afioaga e pei o Magiagi, Saoluafata, Piu ma isi, ina ia mautinoa e tatala loa avanoa e talosaga ai mo fesoasoani i lenei tausaga ae ua mafai ona tusi talosaga, faalauiloa atinae o loo faatino aemaise o le tupe faaagaga e faaauau ai nei atinae e mafai ona tusia i se tala o le tupe mo le EU.
O le autalavou a Piu o loo faatino se latou atinae o le masoā ma ua iai foi se togafa‘i tele. O Magiagi ua amata se a‘oga faitautusi a tamaiti i le faa Samoa ma le faa-Peretania.
O Saoluafata o loo iai le atinae o Fesootaiga televavave faaonapo nei ae o isi o atinae o togalaau aina ma togalaau faisua, o isi o atinae tau i faiva alofilima ua faatino uma ma le manaoga ina ia lelei afioaga taitasi o loo iai nei atinae ma ia faasafua ai le atinae auā sui o afioaga o loo faatautaia ia atinae.
