Ua fautuaina mātua o aooga alo ma fanau i le aoga tulagalua o le St Theresa i Lepea ia vave ona agai atu e momoli fanau i le fale ina ua tulai mai se gaioiga solitulafono na faamalosi ai ese alii ua matua se teineititi 10 tausaga le matua o lea aoga a le ekalesia katoliko.
Ua faaalia e le tamaitai sa pule aoga i se lipoti i le nusipepa o le Observer na faatali le teineititi e alu atu lona tina e piki ma ave i le fale, ae na tuai ona savali lea o le teineititi i se faleoloa e lata ane lava i le nofoaga o iai le aoga. O le savaliga lea na faafetaui ai e se alii ma ia fai i le teineititi la te o e momoli ia i le mea o iai lona tina.
Peitai ua faamatala le pule aoga na ave e lea tagata le teineititi i se nofoaga sa iai se pamu penisini ma faatino loa i ai ni faiga matagā. E iai isi aoga o loo i lea vaega o Lotopa ma Lepea e pei o le aoga tulagalua o le Ah Mu Academy, le aoga tulagalua a Robert Louis Stevenson, le kolisi a Pesega ma le kolisi a Faleata.
O loo suesueina nei e leoleo lea mataupu ma e lei manuia sailiga i leoleo mo se faamatalaga poo ua maua le tagata na faia le solitulafono i le teineititi sefulu tausaga le matua.
O le tulai mai o lenei faalavelave ua lē gata ina toe fautuaina ai mātua ina ia manatu mamafa i le taimi e tatau ona piki ai fanau pe a tuua aoga, ae oo foi i taimi e momoli atu ai, e tatau lava ona afe lelei atu taavale i totonu o le lotoā ina ia faamautinoa ua iloa e le matua ua saogalemu lelei lana tama i totonu o le faleaoga a o lei alu ese atu.
O le aoga foi ia ua toe faamalosia atili ana tulafono i totonu o le aoga mo le fanau aoga aemaise lava i taimi tuua, o le a lē toe soona oese mai tamaiti i fafo, seiloga lava ua oo atu le tagata o le aiga poo le matua, lea ua uma ona iloa e le aoga, o ia lena o le a pikiina le tamaitiiti.
O le tulai mai o lenei faalavelave, ua avea foi o se lapataiga mo isi uma aoga ina ia mafai ona malupuipuia ola o nai fanau mai tagata leaga o loo lamalama e faia soligatulafono faapea.
