O se faaseā a le Sui palemia ma le pule o se pisinisi
O loo tālia se faaiuga a le asosi tusitala o Samoa ma le lautele o le pulega o auaunaga ma tautua faatusitala ma le au faasalalau i le atunuu, i le faatuina o se itutino e ave i ai faaseā a le atunuu ona faaletonu e aafia ai lea auaunaga pe a lē lelei ona faatino.
O le autū o lea itutino ia avanoa ai le atunuu lautele e faaulu ni faaseā ma ia maua ai foi le avanoa e suesueina ai ni faaletonu o le faatinoga o le galuega faatusitala ma faasalalau.
E lē fua tasi i leitio, televise ma nusipepa le aliali mai o faaletonu e aafia ai le au faigaluega ae peitai o le tele lava o ia faaletonu e sailiili lava i se tulaga faalotoifale i le va o le pulega o se itutino faasalalau ma faia ai se faaiuga i le faatoese i se tagata ua aafia, ma faasala le tagata faigaluega a lē o se tusitala, o se pueata poo se tagata faasalalau.
O le nusipepa o le Samoa Observer na ave i ai se faaseā a le afioga a le Sui Palemia Fonotoe Nuafesili Pierre Lauofo, ona o se lipoti a se tusitala tamaitai o lea nusipepa na faasalalau ai ni faaupuga e faapea, o le finagalo lea o le Sui palemia. Peitai na faaalia e Fonotoe i sana tusi i le faatonu na faasalalau e lea nusipepa, la te lei talanoa ma le tusitala ma e leai foi ni ana faamatalaga faapea na faia.
E tasi le aso na va ai lea tusi faaseā na mafua ai ona faia se faatoesega a le nusipepa i le Sui palemia, ae oo atu foi i le nusipepa lava lea se tusi faaseā a le pule o le pisinisi o le Coin Save na ta‘ua ai foi e lei faia sana tala pe talanoa ma le tamaitai tusitala ae ua te‘i i le alu atu o le lipoti ua faasalalau atu ai ni faamatalaga na te lei faia.
O se tasi lea o vaega tāua i le galuega faatusitala, o le lipotia o manatu i se tulaga sa‘o ma paleni ma e atagia ai foi sa faia se talanoaga ma sea tagata i se auala moni ae lē o le nofo lava ma fai ni faamatalaga e aunoa ma le fesootai pe talanoa i se tagata.
O le vaiaso na tea nei na faamalolo ai lea tamaitai tusitala (taofia le suafa) e le pulega o le nusipepa.
Faaalia e se tasi o tusitala o le nusipepa, o le mafuaaga ona o faaseā na avatu e le Sui palemia ma le pule o le Coin Save. O lea tusitala sa galue muamua i Amerika Samoa i se tasi o nusipea i le teritori, ae ua savalia nei le tolu tausaga talu ona galue i Samoa tutoatasi.
O le mafuaaga lea e tele ai faitioga i le galuega faatusitala pe a lē utagia ma usitaia e le au faigaluega taiala o le galuega. E leai foi se isi e i luga ae o le tulafono pe a oo ina faamaonia ni faaletonu, auā ua tatou iloa ma silafia a lē faia se togafiti i se faaletonu e tulai mai, ona taunuu lea o le upu, ‘o le po‘u e tupu ai le papala.’
