E toalua ni alii leoleo sinia o le matagaluega o leoleo ua faamalolo lē tumau a’o faia ni suesuega faasaga i ni tuua’iga ia i laua. O alii leoleo sinia ia e toalua, o loo galulue i le vaega o le TCU poo le Transnational Crime Unit, poo le vaega e gafa ma le mataituina o soligatulafono faavaomalo i le Matagaluega.
O tuua’iga o le umia o laau malosi poo fana e lei laiseneina faaletulafono, o loo tuua’ia ai le alii leoleo o Shrikishna Schwanke ma le alii leoleo Sinia o le Matagaluega o Ituau Ale, o loo faia i ai suesuega a le Matagaluega. Na fesiligia le komesina o leoleo Su’a Fuiavailili Egon Keil i le mataupu, lea na ia faaalia manino, a oo loa i tulaga e tuua’ia ai leoleo, i ni tulaga e lē faatagaina i le Matagaluega o lona uiga e lē mafai lava ona toe ‘alo ese ai mai i le faia o le mea e tatau ona fai.
“O loo manino lava le tulaga ma tiute faatino a leoleo, afai o le a aafia i ni soligatulafono, pe iai ni gaioiga faatino e faatatau i tu ma aga lē taualoa, e tatau lava ona fai i ai se faaiuga.”
“O leoleo o latou tiute o le faataunuuina ma tausia le tulafono, ae lē o le taulamua e talepe le tulafono ua mae’a ona fai ma mulimulitai uma i ai tagata. E lē faapea e aafia ma molia tagata lautele ona o tulafono ae saoloto ma faatino e leoleo le soliga o le tulafono.”
Faaalia foi e le Komesina o Leoleo e tele aiaiga o loo limataitaiina ai le faatinoga o galuega a leoleo, ma e faapena foi i soo se Matagaluega ma soo se Faalapotopotoga a le Malo ma le vaega tau Pisinisi i le atunuu, ma o taiala uma nei e faaaogā lea e faamalosia ai le usitaia o tulafono ua mae’a ona faataatitia ma lea foi o loo faia e le Matagaluega o Leoleo.
“Afai lava e iai se tagata faigaluega a le Matagaluega e na te solia le tulafono, pe na te lē usitaia foi tulafono ma taiala faataatitia i totonu o le Matagaluega, e leai lava sona alofaga i la’u tilotilo faakomesina o leoleo, ma e lē mafai ona ou faapasiina e aunoa ma le lē faia i ai o ni suesuega faapitoa.”
O le tulai mai o le faamalolo lē tumau o nei alii leoleo, ua faaalia ai foi le lē fiafia o le alii Komesina o Leoleo, ma ia faaalia, e lē faapea foi a aafia alii leoleo i le tulaga lea ona aafia atu ai lea o le ta’uleleia o galuega a le Ofisa o Leoleo o loo faia nei.
“O loo toatele alii ma tamaitai leoleo o loo galulue lava i le mea e gata ai lo latou taumafai ina ia faia le galuega i se tulaga faamaoni auā le puipuiga o le saogalemu o le atunuu lautele, ae o le tulai mai o lenei mataupu o se tulaga ou te faanoanoa ai, ae ui i lea se’i faataunuu suesuega a leoleo i tuua’iga ua tuua’ia ai le alii leoleo ma le alii leoleo sinia pe faamaonia pe leai foi.”
O se vaiaso ese le vaiaso ua mavae nei, i le faagasolo o le faamaloloina lē tumau o tagata faigaluega a le malo, e aofia ai ma faamasino Sinia o le Matagaluega o le Faamasinoga o Fanua ma Suafa. O le sui pelesetene o le Faamasinoga o Fanua ma Suafa, o le faamasino Sinia ma le faamasino ua faamalolo lē tumau se’i faia suesuega.
O le afioga i le sui pelesetene ia Sevealii Panapa Vee, Lavea Hazelman ma Nanai Pologa Ioane ua faamalolo lē tumau.
Peitai na faaalia manino e se tasi o tamaalii ua leva ona galue i le Faamasinoga o Fanua ma Suafa lea ua litaea nei, faatoa tupu a lea o se mea faapea i le faamasinoga o Fanua ma Suafa. O loo masalomia o se mataupu tau faamasinoga o Fanua ma Suafa lava ua aafia ai.
O loo faaauau suesuega.
