“Na ou faamavae lava a o lei faalauiloaina e le Palemia i le faafaletui”
…Peseta Tevaga
Ua avea le mataupu i le Minisita o Tupe ma faitotoa ua tatala ai le avei ma motusia le mafutaga a le minisita ma ana lagolago le afioga Peseta Vaifou Tevaga, ma Tialavea Seinafolava John Hunt. E oo mai i le taimi nei e lei faailoaina e le Palemia poo ai faipule o lana vaega faaupufai ua see atu po ua tofia e suitulaga i ia tamalii sa avea ma minisita lagolago o le tupe.
O lana saunoaga i le faatalatalanoaga ma tusitala i le vaiaso ua mavae na ia ta‘ua ai, o le faitioina o ia tamalii i le iai o o la aafiaga poo conflict of interest i le faia o faaiuga a le komiti o tauofoga i galuega a le Malo, o le mafuaaga lea ua aveesea ai ma lea matagaluega.
Peitai na tautino le Palemia e leai ma ni mea faaletonu sa faia e ia tamalii a o avea ma minisita lagolago o le tupe, e ui ina malolosi faitioga i le itu lea.
Ua ave ai le fautuaga a le taitai o le Malo ia i latou e faia ni pisinisi pe umia ni pisinisi i le leai o so latou avanoa i le tofi faipule auā e matuā sā taputapu ona iai ni o latou aafiaga faapea i le faatinoga o o latou tiute faafaipule o le Palemene, aemaise lava pe a faapea o loo i totonu o le faigamalo.
Tasi lea o aiaiga mo tiute faafaipule o loo pito mamafa i tulafono tumau pe a faia tautoga o le loto faamaoni i tofi o itumalo i upufai o le atunuu.
O se tasi foi lea o faitioga a le Itu Agai i minisita lagolago ua faamalolo, o le iai o o la sootaga faapisinisi i le iloiloina o tauofoga mo le faia o galuega a le Malo. O le tasi o tamalii e iai sana konekarate faufale, a o le isi o se konekarate fau auala.
Sa faaalia e le taitai o le Itu Agai ina ua fesiligia, e moni lava i ni tuuaiga sa folasia e le latou itu faaupufai, peitai o loo nofo pogisa faipule ua aveesea i le mafuaaga. Sa faailoa lea tulaga i le afioga Peseta Vaifou ae sa soisoi le faipule e leai sana tala.
O le taimi nei e lei faailoaina e le Palemia poo ai faipule ua filifilia mo le matagaluega o le tupe, ae e iai le talitonuga o le fono a le Palemene i le vaiaso nei o le a folasia ai le tala autū o le tupe, o le a faasilasila ai e le taitai o le malo minisita lagolago fou mo le tupe.
O faipule ua faamalolo o le la uluai paeaiga lenei i le tofi faipule o o la itumalo i le Palemene o le atunuu. O le a saili ni finagalo o nei faipule pe a faailoa matagaluega o le a galulue ai i tofi minisita lagolago.
