O loo asiasi mai i totonu o le Laumua i Ueligitone le Susuga i le faifeau ia Titi Eteuati ma le faletua ia Faala‘i Eteuati mo le la faamalologa mo le 3 masina e pei ona masani ai le Aufaigaluega o le EFKS.
O le susuga ia Titi Eteuati ma le faletua o loo galulue i le ekalesia EFKS i Foua i Salelologa ma ua sefuluvalu tausaga o faifeau ai pea i le afioaga. Na uluai galulue i le galuega a le Atua i se afioaga o le Itu o Tane i Savaii mo le ono tausaga a o lei valaauina mo le lotu i Foua i Salelologa.
O loo asiasi mai i se tasi o le nofoaalo i le aai o Titahi Bay i le Laumua o Ueligitone.
O le Aso Sa na tea nei na valaauina ai e le susuga ia Perema Leasi o le Taitaifono o le Matagaluega Perepereane i Ueligitone le susuga ia Titi Eteuati, ina ia taitaia le lotu a Samoa ma Tokelau i lana aulotu i le PIPC i Cannons Creek Porirua. O lea na maua ai le avanoa matagofie e lauga ai le susuga i le Faafeagaiga taulagi ia Titi Eteuati i lea ekalesia, ma maua ai se mafutaga fiafia ma nai tagata Tokelau ma Samoa o lea ekalesia.
Na galue faauluaoga le susuga ia Titi Eteuati i le Aoga faaitumalo a le Mataaevave i le Faasaleleaga, ma o se faiaoga mataalia i le aoaoina o le fanau, a o lei oo atu i le avea ma faifeau ma le talaiga o le finagalo o le Atua.
Sa faapea foi ona maua ni avanoa matagofie e faatasi atu ai i ni isi o ekalesia EFKS i totonu lava o le Laumua e ala i le valaauina e nisi o le aufaigaluega e pei o le susuga i le Toeaina faatonu ia Popo Su‘a ma lana ekalesia, le susuga ia Aufaga Faafia ma lana foi ekalesia faapea ma le susuga ia Nove Vailaau ma lana foi aulotu sa valaauina le susuga ia Titi ma le faletua e latou te mafuta ma taitaia ai sauniga a ia ekalesia manū o maua avanoa e lē lau maua e le tele o ni isi ekalesia e faafofoga ai i le folafolaina o le upu ma le fia mafuta atu i le aufaigaluega mai Samoa.
Ua iai le faamoemoe o le susuga i le Faafeagaiga ia Titi Eteuati ma le faletua o le a foi le faamalologa i Samoa i le vaiaso nei ma toe faaauauina ai le auaunaga e pei ona valaauina ai mo le finagalo o le Atua i lea foi itu o le tovine.
E momoli atu ai alofaaga ma faamanuiaga a le tatou nusipepa i le susuga i le faafeagaiga taulagi ma le faletua a o alo atu mo le toe taliu atu i afioaga o loo sua ai le suotosina mo ni agaga e molimauina le finagalo o le Atua i soo se itu o le lalolagi. Ia manuia tele le faigamalaga i le la to i le ea, le fogaeleele faapea ma le sami.
