Aveese tofiga faifeau o Rev Fatu Manu, ma lona faletua, i le pule faitoatasi a le Sea Sinoti Niu Sila i Matu, Ekalesia Metotisi Samoa. Fesiligia le faamaoni ma le faia o faaiuga sa‘o a le alii Sea, Logo Ofe
E tasi le mafuaaga autū, ae ono ona maga ma vaega ua mafua ai ona faia le faaiuga a le Sea o le Sinoti a Niu Sila i Matu, e aveese ma faamalolo tofiga faifeau o le susuga ia Fatu Manu ma lona faletua.
O le mafuaaga autū o loo taulai i ai le faamaloloina o tofiga o le auauna e pei ona ta‘ua, O le lē usitai.
O le tusi o loo lomia, o loo faalauiloa uma ai vaega e ono ma maga e ono e pei ona ta‘ua, sa vaevaeina i ai, ma talatala ai le uiga o le lē Usitai o le faifeau, na mafua ai le faaiuga, e tulai ese ma le ekalesia ae mālōlō i aiga, ona ua leai ni tofi.
E talitonu le susuga i le faifeau sa faafeagai ma le tausia o le Ekalesia Metotisi i Te Awamutu, le susuga ia Fatu Manu ma lona faletua, o le aveese ai o o la tofi, ma faamalolo mai le tausia o le galuega, o se faaiuga faitoatasi a le Sea o le Sinoti a Niu Sila i Matu, le susuga ia Logo Ofe.
E mafua le finagalo o le faifeau ma lona faletua, ona o le auala na ia faatinoina ai lana faaiuga, atoa ai ma le gaioiga sa ia faia ma faatulai ese mai i le galuega i Te Awamutu.
E lē gata i lea a o le mafuaaga na ia faailoa i le tusi na ia tusia, ma faailoa ai lona toatamai ma lona tiga i le auauna faifeau ma lona aiga.
O le isi faamaoniga o le mau a Fatu, o loo ia silasila pea i ai ma la faafesagai i aso uma, o le tusi na tuuina atu e faailoa ai le faaiuga a le Sea, o loo sainia lava na o ia, faapea ai ma le ulutusi (letter head) e lē mai le ekalesia aoao i Samoa, ae o se gaioiga e faamaonia sa ia lomia lava mai se ulutusi ua na o le Sinoti a Niu Sila i Matu e faaaogāina ai.
O le auala foi na ia tapenaina ma faaoo ai lea finagalo ma le faaiuga, sa lē tatau ona tusia se tusi, auā o lana matafaioi tonu lea, o le silasila ma aumai lana aufaigaluega e talanoa i ai, fautua ma timai, aemaise ai pe afai ua faauliulito lona finagalo e faamalolo se faifeau poo se uso a auauna.
E matuā fesiligia foi e le finagalo o le faifeau ma lona faletua, le moni ma le faamaoni o le faataunuuina o tiute o le Sea, pe a fua ma toe tepa i mafuaaga o loo ta‘ua i le tusi. Sa faamanatu e le faifeau i se feiloaiga ma le Samoa Times e faapea, o lona lava talitonuga e matuā faaletagata, (too personal) ma faaletino lea faaiuga ua faia.
O le faamaoniga o lana mau ma lona talitonuga ona e iai faaupuga sa faailoa ma toe talanoa ane ai nisi o auauna ia te ia ma ta‘ua ai, E masani ona ta‘ua e le Sea, ua ia maua a‘ia‘i le faifeau o Fatu.
I le ma lea sa molimau foi nisi o uso a faifeau, E masani lava foi ona faaaogā e le Sea, Logo Ofe se lafoga faaulaula ma le taufaamata‘u, pe a faafaigata se auauna, ma ia faapea ane ai, E ā, ua e fia pei o Fatu Manu? Ua e fia mālōlō?
O se saunoaga e talitonu le auauna faifeau, ua aliali ai ma iloa ai le mamasagia tele o le tofa ma agavaa mo le tauaveina o le tofiga ta‘ita‘i.
Ona e faapefea ona ia toe lagaina na mea ua mae‘a ona fai lana faaiuga, ua usitaia foi e le auauna, ae foliga mai o loo toe talasua ai, ma faaaogā e taufaafefe ai isi auauna o loo i lalo o lana taitaiga.
E tuufesili foi le manatu o Fatu, pe sa iai se vaega o lona soifua auauna sa tulituliaupu ai lona tagata e le susuga i le Sea.
Ona talu ai o le faaupuga o loo ia faaaogāina pea e faapea, Ua ia maua le faifeau poo Fatu lea e faasino i ai lea faaupuga.
E foliga mai ua leva ona tulituliloa, a o lea faato‘ā maua ina ua faifeau ma galulue tausi nuu i le valaauina sa tofia ai.
E ui lava i le finagalo faanoanoa o le auauna ia Fatu ma le faletua, ona o le faaiuga ma le mataupu e uiga ia i laua, peitai e maualuga pea lona silasila alofa i le Atua ma lona finagalo, aemaise lava o le ekalesia aoao.
O le ala foi lea e lei fia faia ai se finagalo o le susuga i le faifeau ina ua fesiligia nisi o faaiuga ma iugafono a le ekalesia Metotisi, auā o inā e tatau ona fua uma i ai faaiuga a ta‘ita‘i ma i latou e i lalo ifo o le taitaiga aoao.
E lē gata i lea, na saunoa foi le susuga i le faifeau, ua la talia le faaiuga tusa lava poo se faaiuga na faia na o le Sea lava latou, peitai ua a‘oa‘oina lona tagata ma le aiga i le loto faamagalo, aemaise ai o a‘oa‘oga sa a‘oa‘oina ai a o i totonu o le laumua i Piula. Ia usitai i ta‘ita‘i.
E manatu le auauna faifeau ma lona faletua, o le a mafai ona la tali i mea taitasi, ma veaga e ono e pei ona t ‘ua i le tusi a le Sea.
O ia vaega uma sa naunau lava ina ia tali i ai, pe ana faapea e tuu ane sina avnoa e ala i se feiloaiga ma le ta‘ita‘i e soalaupule ai le uiga sa logo eseese ai, ma faitau eseese ai ina ua mae‘a le fonotaga e pei ona saunoa i ai le Sea, ma tusia i le tusi.
E augofie foi le Samoa Times e faia lea tulaga pe afai o le finagalo lea o le susuga i le auauna faifeau ma lona faletua, ina ia manino pea ma saga malamalama atili le mataupu.
O le a faasolosolo atu i vaiaso o i luma le tali a le faifeau ma lona faletua i vaega e ono o loo faatulagaina i le tusi.
E lei manuia le taumafai atu a le Samoa Times i le fia talanoa i le susuga i le ta‘ita‘i le Sea, le susuga ia Logo Ofe. Sa taumafai muamua le telefoni, peitai sa tali mai le masini, ma sa usitaia foi ina ia tuu i ai le feau. Peitai e oo mai lava i le Aso Faraile na tea nei e lei toe fesootai mai.
Sa toe taumafai i ai i le telefoni lava, pe maua se feiloaiga peitai o lona alo tamaitai sa tali mai ma faapea mai o loo fai lava si pisi o lona tuaa.
Sa fesiligia foi pe mata o le ā se taimi e toe valaau atu ai, ae o le tali mai e fai si tuai, masalo o le leva o le po faato‘ā taunuu atu ai i le fale.
O le ala lea ua lē mafai ai ona maua se faamatalaga, ma aumai foi se finagalo o le Sea, agai i le mataupu e pei ona lipotia ma lomia. A tusa ai ma le finagalo o le Atua e aulia le vaiaso fou, o le moemoenoa ai, ae o le a taumafai pea, pe maua sona fianagalo pe leai foi.
Tapuni le Ekalesia i Te Awamutu
O le faaiuga ua faia e le Sea e faamalolo ai le faifeau sa tausia lea galuega a le Ekelesia Metotisi Samoa i lea faaitu o le atunuu, ua faapea foi ona toe faia ai ma le isi faaiuga e tapunia loa le lotu.
Ua faataunuu le faaiuga i le mālōlō ese mai o le faifeau, ma ua mapu ai nei i o la aiga i Aukilani, o le lotu foi sa faia i le aai e pei ona ta‘ua ua leai foi ma ua faataunuu le tapuni aloaia i le faaiuga a le Ekalesia aoao.
O le faamataga a le auauna sa galue ai i le aulotu, e leai lava se isi mafuaaga ua tapunia ai le ekalesia, ae ona ua leai ni tagata.
O le mafuaaga o le lē toe mafuta ane o nisi o aiga, ona sa latou faailoa manino ane lava i le susuga ia Fatu, ua lē gafatia le tele o fuafuaga fai, ma mea faitupe a le Sinoti.
E oo lava foi i le fale sa nonofo ai, ma faafalelemalu ai lana auauna, ua lē gafatia foi ona totogi ona o le taugata tele, ae ua toagaogao le aulotu.
I lalo o aiaiga ma tulafono faataoto a le ekalesia Metotisi aoao, o loo aiaia ai, le lē mafai ona tausavali le faifeau ma fai le lotu.
O le isi lea faaetetega sa iai i le auauna, ona sa manatu o le a nonofo i aiga ma tausavali e auauna, peitai e le faatagaina e le ekalesia aoao lea faiga.
Sa ta‘ua foi e le faifeau, sa ia talosagaina foi le Sea, pe mafai ona faamatuu ane lona tagata ina ia saili se galuega e tua i ai, ma fesoasoani i manaoga tau tupe o le galuega, ma fesoasoani ai foi i tagata lotu i le avega o loo tauamoina.
Peitai o le tali foi e leai, ona o faaiuga lava e lē mafai ai ona faigaluega se faifeau tausi nuu.
Sa faamaonia mai e le susuga ia Fatu sa taumafai lava i le mafai e gata ai ina ia faamausaliina pea loto o tagata, ina ia toe foi ane ma atina‘e le galuega, peitai ua faavaatuia lava finagalo o le toatele, ona o le mafuaaga e pei ona ta‘ua.
Saunoa le faifeau, na te lē mafai ona faamalosia loto o tagata, ma sa ia vaai foi ma le alofa, ma faamaonia le tele o aiga e feagai pea ma faafitauli tau seleni.
O le tele lava o aiga ua mae‘a lava ona paketi tupe maua mo le tausia o aiga ma pili masani, ae taufaaofiofi atu ai ma manaoga o le ekalesia foi latou ia, ua atili ai ona mate le faamoemoe ma tuua le lotu.
O le susuga ia Fatu Manu ma lona faletua ia Kuini, sa avea ma ta‘ita‘i o le autalavou aoao i le Sinoti a Niu Sila, a o lei filifilia ma valaauina e galulue faafaifeau i Te Awamutu. Ua tele foi tausaga sa auauna ai ma galulue i le galuega, peitai o lea ua faamutaina nei ona o se faaiuga ua faia i ai.
O le isi vala o le saunoaga a le faifeau sa lagona ai foi le faanoanoa, ona sa ia ta‘ua le tulaga i le va ma o laua aiga. Ua lē o lea le faamoemoe e pei ona sa avea ai ma taulaga tagata a aiga na lua.
Sa manatu foi i le gapatia ma le tigaina o la aiga i le tele o taimi ona o le naunau e fai se aogā, ma faaauau pea le soifua ofoina mo le Atua ma lona finagalo.
Peitai ua faafuasei ona faaselemutu, ma taofia ona o faiga faaletagata, ae ui i lea, ua sauni pea e fetaiai ma faigata, ma ua saga finau atili ai pea i le Alii ina ia faasino mai se isi auala e faaaogāina ai pea le olaga mo ia. O le faamaoniga foi lea o lana tali sa tali ai le fesili a le Sea sa fesiligia ai lona tagata ina ua faato‘ā alia‘e le faafitauli o le galuega i Te Awamutu.
Sa faateia ina ua fesili ane Logo Ofe ia te ia, Poo fia faifeau pea, pe leai, o lana tali sa faia i ai, Ioe o loo tumau pea lo‘u fia galue mo le Atua.
O le a faaauau pea i le vaiaso fou, le tali a le faifeau i mea taitasi e pei ona ta‘ua i le tusi, ma ua avea ma mafuaaga ua aveese ai tofiga, ma faamalolo ai mai le galuega tausi nuu.
