Faamalolo faiaoga lagolago Manu Samoa 15

Ua savali nei ma le masina atoa talu ona faamalolo e le Ofisa o le Iuni Lakapi a le atunuu Faiaoga Lagolago o le Manu Samoa e toalua.

Na ta‘ua i se lipoti mai le atunuu le ave o se Tusi a le Iuni Lakapi i nei tamalii e toalua sa fai ma Faiaoga Lagolago, ma o nisi foi ua loa ona tautua i le Taaloga Lakapi mo Samoa, e faamalolo ai o la tofiga.

O i laua nei o Paepae Stan Toomalatai o le faiaoga lagolago o le laina i luma, ma le susuga a Fepuleai Selefuti Patu o le faiaoga lagolago o le laina i tua a le Manu.

E lē o matuā manino mai i le taimi nei le mafuaaga tonu o lea faaiuga a le Iuni Lakapi e ui o lea ua savali ma le masina, se‘i vaganā ni tala feaveai e le matagi o loo ta‘ua ai mea totino a le Iuni Lakapi.

Ua faia lea faaiuga a o lumanai ai le Taamilosaga a le Ipu o le Lalolagi o loo mataituina e atunuu uma i Niu Sila nei. O se tulaga e faateia ai le toatele i lea mataupu, ona o lea faato‘ā mae‘a le Taamilosaga na suipi ai le Manu Samoa i le Ipu a le Pacific Nation Cup i Apia, a o lea ua taai fala o alii Faiaoga Lagolago, ma atonu e iai se isi tulaga ogaoga e lē o mafai ona silafia e le lautele o le atunuu.

O le taaloga Lakapi ua pei se tupua ia Samoa i lenei taimi talu mai lava foi ona faamanuiaina lana Taitoafitu i le taamilosaga IRB. E oo mai lava i le taimi nei e lei iloa lava poo ai o le a suia ia tulaga mo le Lakapi a le atunuu, ae na maua mai Samoa le saili mai i Niu Sila nei o nisi e agavaa ai. E aogā lava foi suiga i nisi taimi mo le lelei, a o nisi foi taimi, o suiga e amata ai ni masei.