O le Aso Sa o le vaiaso talu ai na faamanuia ai susuga a faafeagaiga na faatautaia le sauniga lotu o le tutoatasi i le paia ma le mamalu o Sini. Na taitai i lea sauniga le Afioga i le Sea o le Sinoti a Niu Sa Uelese, Rev Halefoti Seloti.
O le lotu faamanatu o le tutoatasi o lenei tausaga o le taimi faaiu lenei o le a faafofoga i ai Sini ia Rev Halefoti Seloti lea ua sauni atu e siitia i le tausaga Fou.
O le tatalo na saunia e le failautusi o le sinoti ia Rev Ropeti Enoka o le Ekalesia Metotisi i Macquarie Fields. O le lauga na fofogaina e Rev Faagu Toomalatai o ia foi o le failautusi a le Sinoti lea e galue i le Ekalesia Metotisi i Penrith.
O le matua o le lauga mai le faitauga o le Tusi Paia na faamamafa i le faaiuga a taitai e malaga i Kilikala mo se lumanai manuia o tagata lautele.
Na faafetai ai foi le afioga i le faatonu, le Toeaina ia Rev Peleti Toese Toailoa le autasi o Fono e lua e tuufaatasia le faamoemoe o lenei tausaga. E lē gata i lea na matagofie viiga ma pesepesega na molimoli e le EFKS i Fairfield, Metotisi tuufaatasi aemaise le failipu (brass band) a le Aso Fitu.
Na saunoa foi faatamā o Fono e lua, e faafetai i le faamalumaluga a faafeagaiga ma a latou Ekalesia i le tuufaatasiga o le faamoemoe. Sa avea foi le Konesula o Samoa i Sini, Tofa Manogiamanu Fonoti Etuale Ioane ma le faletua e fai ma Sui o le Malo i lea po tuupoina.