O mea nei o Faaili ua tele so latou sao i le atinae o Aiga, Ekalesia, Nuu ma Faalapotopotoga i Sini nei. O le mafuaaga lea o le faatupulaia o le fuainumera o faaili eseese ma teine ma tama pepese i Sini. Ae peitai o le Aso Faraile ma le Aso Toonai talu ai na toe molimauina ai e le mamalu o le atunuu le faaili talenia ma le logologoa mai Niu Sila le FIAFIA band.
E na o le lua lava ana faafiafiaga na faia i St Mary’s i le po o le Aso Faraile sosoo ai ma le pitonuu o Bankstown i le po o le Aso Toonai. Na matuā faatumulia uma nei po auā sa gasolo atu ai aiga uo ma ē fiafia i fatuga ma leo o le faaili logologoa. O lenei faaili e faamautu i Aukilani ma o ni suafa iloga i le musika o loo faafoeina.
Na saunoa le taitai malaga ia Pauli Sanele, ua loa tausaga o tautua nisi o le faaili i lenei faiva i Samoa ae lei masii ma aumau nei i Niu Sila. O le susuga i le alii pese ia Paul Ah Kuoi mai Alafua ua loa lana tautua i le Talofa FM mai le 1994, lea sa avea ai ma alii faasalalau i le ao aepeitai o le po e pese ai i le Faaili iloga a le RSA.
O le vaitau lea o le 1996 na pueina ai le CD muamua a le RSA ua faaigoaina o le ‘Aumaia lou Alofa’ i lalo o le puleaga a le Alii pule a le RSA afioga Afoa Faleulu Mauli.
O se CD muamua i Samoa na talafeauga ma le vaitau o le Faaaliga o ‘Tala Measina’ poo le ‘Pacific Arts Festival’ na faia atu i Samoa i le faaiuga o le 1996.
O lenei CD na matuā taatele i lea vaitau ma fai ma oso o le toatele o malo asiasi atu o le Pasefika e fai ma faamanatu mo Samoa (souvenir). Na faapea foi ona lē malolo i le leitio a le 2AP, TV Samoa faapea le Talofa FM i lea vaitau seia oo mai lava i le asō.
O lenei lava CD (RSA 1996) na iai ma le susuga a Hemi Solomona Junior le alii ta piano ta‘uta‘ua o le alo o le afioga Maiava Hemi Solomona ma le tina ia Tusi.
O Hemi Solomona laitiiti ua loa ona iai i le faaili a le RSA faatasi ma Paul Ah Kuoi ae lei siitia i Niu Sila. O le vaitau lea o le logologoa o le RSA i Samoa ona o le faagalogata o le matagofie o le CD faapea tafaoga a latou e asiasi atu i ai.
O le sui matua ia Peneueta Solomona i le piano ua loa foi lana tautua i faaili na logologoa i Samoa e pei o le Mt Vaea Band i Lalovaea i vaitau o le numera tasi o le Mauga mo tafaoga ma faafiafiaga i Samoa. O le tapunia o le Mauga na see ai loa le fusi i le RSA lea na fausia fapitoa mo le Asosi a Samoa mo i latou na tau i taua o le lalolagi.
O le susuga ia Pene ma Hemi faapea le alii pese leo lelei ia Ah Kuoi ua iloga nei lo latou faavaeina o le Fiafia Band faatasi ma sui ia Walter Laulu, Siamani Tofilau, Sila Onalei, Junior Lale, Filene Pauli ma le tamaitai pese mai Toga o Melenau Lino.
E $15 se tau na faatauina ai la latou CD fou nei i po e lua ma sa vaaia le alumia. O le taimi muamua foi lenei na sisiva ai Sini i se faaili e lē malolo (nonstop) le musika talu ai le agavaa ese o le faaili.
E na o le fa(4) aso na malaga mai ai le Fiafia band i Sini taunuu mai i le Aso Tofi ae tuuvaa i le Aso Sa. E toe foi le faaili i Niu Sila a o lenei ua toe tuufesili tagata pe toe asiasi mai afea. Ua taunuu ai upu masani…Ua malie mata e vaai, ua logo faatutuila le faafofogaaga ma le siva faamalositino ua matuā seki lava i faiga a le Fiafia.
