O le tama poto ma usitai na te momoliina mai le fiafia moni i loto ma finagalo o mātua, e lē faigata foi la ona faatino se manaoga e tali atu ai mātua.
O nisi na o saunoaga na momoo i ai le tofa ia Faalafi Kamu ma le tausi ia Mele Lale Lemana i si o la alo, le alii o Tipa Lale Lemana, i le malie atoatoa ai o o la loto i le tauisga a lenei talavou ia i laua i soo se vaega.
O molimau na logo faa-Tutuila ai le faafofoga a le auvalaaulia a o tolaulauina galuega mae‘ae‘a e faia pea e Tipa i aso faisoo, e olaola pea e pei o se lamepa o faafouina lona pupula, e sulugia pea e le malamalama.
O le aso 20 o Iuni na atoa tonu i ai le 21 tausaga o le susuga ia Tipa ae o le po o le Aso Faraile 24 o Iuni 2011 na atofaina e potopoto ai aiga ma uo e molimauina le faamanatuina o lona 21 tausaga.
O loo galue nei o ia i le faletupe o le NAB i le taulaga i Brisbane. O nai ona tuaa o le tofa ia Faalafi Kamu (Faletagaloa i Safune Savaii) ma si ona tina ia Mele Lale Lemana mai Lotofaga.
O se talavou e na te faaolaolaina pea tu ma aga faa-Samoa moni, o le faamaepaepa lea o ana ‘augafaapea (Tangi ma Aggie) ae fai uma e ia tiute ma faiva i totonu o le aiga, e ui ina soifua a‘e i atunuu i fafo peitai o ona i‘oimata nai ona tuafāfine ae sili ona ava i ona mātua ma faaaloalo i soo se tagata.
Na tapenaina e le susuga i le Tausi Matagaluega ia Rev Siologa Mapuilesua se upu taiala mo le talavou ia Tipa auā le agai i luma o lona soifua, ona alo lea i le taumafataga na tapenaina lava e si ona tuaa ia Mele Lale faapea le aiga alii.
Na tapenaina e le paia o aiga le mea sili e ala i faaaloaloga auā se tofā ma se inati ona e faigata le susuga i le Tausi Matagaluega ia Rev Siologa ma le faletua ia Atonia Mapuilesua faapea le faletua malolo ia Siniu Tupu Tuiā, ae tainane le paia i malo faaaloalogia, faapea se vaega o le Ekalesia Uniting Church a Inala sa auai.
Sa malaga mamao mai le tofa ia Faalafi Tipa Lale mai Kalaiesetete e fai ma fofoga o le aso, o le uso lea o le tuaa poo le tamā o Tipa.
Na tasi moemoe le Ekalesia faapea le auvalaaulia i le Aao tusitusi o le Matagaluega Metotisi a Algester le tofa ia Maulupe Agaseuo Manase Tuiā e momoli se agaga faafetai e tusa ai ma le matagofie o le po i ona teuga eseese, ona alo foi lea i faafiafiaga ma taape ai le aofia ma le mama ua lomi ma le vaa ua goto.
Manuia tele le atoaga o lou 21 tausaga Tipa Lale Lemana. Ia foai mai e le Atua se tofi lelei mo oe i le lumanai!
