O le alii e suafa ia Glenn (Kelegi) Chan Tong, o se tasi o alii ua logologoa lona suafa i Leoleo ona o le tele o moliaga o le gaoi ma le faomea ma isi sauaga ua ia faia i le talafatai o le taulaga. O lana masani e foliga mai e nofonofo i vaega eseese o le Maketi i Fugalei poo faleoloa lata ane ona ia lama ai lea o tagata e na te osofaia.
E foliga mai e lama lava e lenei alii tagata e manatu e faigofie ona ia osofaia.
O se tasi o ia tagata na aafia ai i faiga a lenei alii, o se failauga Metotisi mai i Falelauniu e suafa ia Saufoi Afutoto. O lenei alii e galue i Saleufi i le lomiga a Le Weekender, ma o lana galuega e aofia ai le faia o teugatupe, tufa o pili a kamupani e fai faasalalauga i le nusipepa.
E lē gata i lea o ia e feagai uma ma galuega o le teuina o le ofisa.
O lona totogi na maua i lana galuega na agai ai loa e faatau ai se pusa apa o se faalavelave faalelotu – ma na agai i le lotoā a le Moatoga e faatau ai se pusa apa. E alu atu ua tuai ua mānava ma ua tapunia lea faleoloa. E toe foi mai ae faafetaui loa e Kelegi ma taia o ia.
“O le tagata e laitiiti atonu e lei atoa lelei lona 30 tausaga pe ua sili laitiiti atu foi ae na taia a‘u a o o‘u agai mai i fafo o le lotoā a le Moatoga, lea e faafesagai ma le Maketi i Fugalei.”
Sa inu ava lea alii ma nisi alii sa i autafa o se taavale na tu tasi lava i totonu o le lotoā a le Moatoga, o le faamatalaga lea a Afutoto. Faaali e lenei alii na pa‘ū i lalo ae faalogo atu ua tatao lona ulu i le eleele ma e leiloa poo se vae poo se lima o le alii lenei o Keleni na taofiofi ai o ia, ae se‘i loa lona totogi atoa lea e i totonu o le taga o lona ie faitaga. Na taumafai e tu ane i luga ae ua tau sola le alii “tino tele toe lapoa”.
Ta‘ua e Afutoto na mau lava i tua o le mitiafu o lenei alii ma toso atu ina ia aua ne‘i alu ma lana tupe o lona totogi atoa lea ua uu e lenei alii.
“E $189 tala le tupe lea na ia te au ae ua ave uma ae ou te taumafai atu e aveese la‘u tupe ae tatu‘i loa ma a‘u”.
E ui i le mafatia o Afutoto ona o le tau pupuni o ona foliga ma le lē manino o lana vaai ae na faaofiofi atu lava ana tu‘i ma o le tasi o tu‘i na tau sa‘o lava i le auvae ma alu ifo loa ma le alii lenei toe faalala ane loa ma lana tupe.
Faaalia e Afutoto, e faalogo atu i le taimi lea ua tau lē mafai ona gaioi i le tiga atoa o lona ulu ma lona tino i le tatu‘iga e le alii lenei.
Ae o lea lava na o le matamata o isi alii na o latou inu faatasi ma laulaututu atu tagata o le maketi ua iloa atu le mea ua tupu ae e leai ma se isi na fesoasoani atu. Na o le taufonō o tagata o le maketi i Leoleo o lea nofoaga i le ofisa o Leoleo lea e i totonu o le Maketi.
“Na vave ona toe fao ese la‘u tupe mai i le tamaloa ma toe alu atu loa ma le isi tu‘i se‘i faatea ai lo‘u ita tele,” o lana faamatalaga lea. Faaalia e lenei alii na mae‘a le gaoioiga lea ae ua toe fefe ua vaai atu ua sau le palapala i le fofoga o le alii lenei ma ua na o le taatiatia lava i luga o le alatele.
“Na ona o atu lava o Leoleo toso mai lava i luga o le auala lea agai atu i le ofisa i totonu o le maketi ae mulimuli atu i ai le anoano o le au matamata o le Maketi”. Na ave loa Afutoto ma le alii o “Kelegi” i le ofisa o Leoleo i Tauese ma o inā na taofia ai loa e Leoleo. O inā foi na fai ai ma le faamatalaga o se tagi a le Alii Failauga o le Metotisi lenei, e lei tea ese lava le tatavale o le fatu ona o le fasi o ia.
Faaalia e Afutoto na ta‘u ane ai e Leoleo o le tagata lenei o loo tālia foi le tele o isi ona faamasinoga e faatatau lava i osofaiga faapea na te faia.
O le isi o ia mataupu e aofia ai lona faia o ni amio matagā i se tamaitai e lē atoatoa le malosi i le mafaufau ma na saofai lelei i luga o le manava o si teine ma fai ai ni uiga matagā.
E ui i le leaga o le osofaiga a lenei alii, e ono molia ai i le faomea ma le faaoolima, ae na toe tomanatu lava le alii o Afutoto ma ave ai loa sana tusi e taumafai ai e toe faaui i tua se faitioga poo se tagi na ia faia i lea po ona o le manatu, ua uma le maliu o Iesu ae o lea o le a faaauau pea lona ita ae lē faamagalo loa.
O le tali a Leoleo o le a iloilo ma toe vili ane le alii o Afutoto ae o lea ua faaulu le tagi, e tatau lava ona ave se isi aoaiga ia Keleni e ui o se tagata ua faigata ona toe sui le olaga ma le faia o nei uiga solitulafono.
E mae‘a lea mataupu ua tea le valu i le po (8pm) ma na momoli lava e leoleo le alii lenei ua matuā fulafula foliga ma le tino ona o le faaoolima a Keleni ma na ta‘ua e Afutoto e na o le faafetai lava i le tu atu o Leoleo mo ia ma le fesoasoani. Na saili ai lava foi le pusa apa ma fai ai le faatau a Afutoto na agai atu e fai ae faaoolima loa i ai Keleni.
