O le alii faigaluega a le Matagaluega o le Suavai o loo feoai e tipi paipa o aiga e le totogia pili vai

O le alii faigaluega a le Matagaluega o le Suavai o loo feoai e tipi paipa o aiga e le totogia pili vai

Faamagalo le pili o le vai

O le faamagalo ai o pili o suavai poo aitalafu o le suavai e lei totogia e le’o se mataupu fou lenei ile Malo pe a fua atu foi ile tele o tausaga ua tuana’i. I le lipoti faaletausaga a le Faalapotopotoga a le Pulega o le Suavai mo le tausaga faaletupe 2016 – 2017, lea na tuuina atu ile komti o atina’e eseese a le Malo o loo manino mai ai le aofaiga o ana aitalafu tusiesea (write – off) e oo atu ile $2.6 miliona tala.

O lenei aofaiga o tupe o loo nofo aitalafu ai nei nisi o le mamalu o le atunuu taitoatasi, o sui maualuluga o le Malo, o nisi o faalapotopotoga a le Malo ma Matagaluega, o aoga a Ekalesia ma le Malo faatasi ai ma nisi o pisinisi, ma e oo mai ile taimi nei e lei totogia lava a latou pili o le suavai e pei ona tuuina atu ai loa e le Pulega o le Suavai lenei lipoti ina ia tusiesea pe faamagalo loa.

E lei mafai ona faamalieina le komiti o atina’e eseese a le Malo ile lipoti lenei a le Pulega o le suavai mo le tusiesea ai o nei aitalafu ona e manatu le komiti, o se aofaiga tele lea vaega tupe e lei mafai ona aoina mai e le Pulega, ma e le’o iai foi se naunautaiga o le Pulega o le suavai ina ia mafai ona toe aoina mai nei aitalafu. E talitonu le komiti ua tatau ile Pulega ma le Komiti Faatonu ona faamamafaina lenei tulaga ina ia mautinoa le le toe tula’i mai ile lumana’i ma aafia ai ana tupe fetafeaai (cash flow). E tatau foi ile Pulega o le suavai ona faamalosia le aoina o aitalafu tuua uma, ao lei tuuina atu e aiaia i lalo o aofaiga e tusiesea (write – off).

O le isi vaega taua sa faamamafaina e le komiti lenei a le Malo, o le toe iloilo lea o faiga faavae ma faatinoga a le Pulega o le suavai (policies and practice) o lo o iai nei i aitalafu tuua o le a tusiesea ina ia toe faaopopoina le taimi talafeagai faatulagaina e tuuina atu ai aiaiga, ae le o le 12 masina e pei ona iai nei. O le popolega o le Komiti, o le vave aiaia lea o aitalafu i totonu o le 12 masina i lalo o aiaiga faatulagaina ma avanoa ai mo le tusieseaina ae o loo iai lava le mafai gafatia e toe aoina ai nei aitalafu e fesoasoani i tupe maua a le Pulega. O sui o le komiti o atina’e eseese nei a le Malo e aofia ai le taitaifono ia Tafua Maluelue Tafua, o le sui taitaifono ia Olo Fiti Afoa Vaai, o sui o le Komiti e iai Faumuina Asi Pauli Wayne Fong, Afioga ia Laauli Polataivao Leuatea ma le tamaita’i faipule ia Faaulusau Rosa Duffy – Stowers.

O nisi o aitalafu ua tusiesea e aofia ai le aitalafu a le taitaifono o le Komiti a le Pulega o le Suavai, le Afioga ia Matatauali’itia Afa Lesa e $2,210 faatasi ai ma le aitalafu o lo o i lalo o le suafa o le Minisita Lagolago o le Matagaluega o Tupe Maua a le atunuu, Lenata’i Victor Tamapua e $3,880.25. I le lisi atoa o nisi o aitalafu e aofia ai le aiatalafu o le suavai mai nisi o aoga lea e oo atu ile $16,736.81 ao aitalafu mai nisi o ekalesia e $27,380.09. O le aofaiga atoa o aitalafu mo Matagaluega a le Malo ma nisi o faalapotopotoga a le Malo e $39,159.63 ao pisinisi ma nisi o faalapotopotoga tumaoti e oo atu ile $68,113.75 ae tele ai lava aitalafu mo tagata taitoatasi e $2.45 miliona tala.

Taua e le taitai o le atunuu ise feiloaiga ma le tatou nusipepa, o le faafitauli masani lava lenei e tula’i mai i tausaga taitasi, o nisi o aiga ua le gafatia ona totogi le pili o le suavai, ae a oo ina tulituli atu e le Pulega, ae sau le tali e ese le isi aiga sa nonofo muamua ile fale lea na mafua ai ona alu i luga le aitalafu, ae o le mea moni o tagata lava o latou aiga. Ua masani foi tagata o le atunuu lenei e faaoga faasoloatoa ae fiafia e totogi mulimuli, lafo mai foi le tupe mai Niu Sila e totogi ai le pili o le vai ae ua faamuamua ile fagupia a le tama ma nisi mea e le aoga ae galo ai le suavai, ua ia i foi nisi o le atunuu ua sulu atu i lona ofisa e manaomia se fesoasoani ona ua tipi le latou paipa, ae sue atu ile Pulega o lo o mafiafia mai ai se aitalafu e lei totogia, o le saunoga lea a le taitai o le atunuu. Fautua mai Tuilaepa, ia fiafia e faaoga le suavai ma fiafia foi e totogi le pili o le suavai ona e fia ola foi le pulega o le suavai latou ia.