Ua lamalama faaiu polokalame o lenei tausaga, ua tulalata foi i le vaitau o faiga meaalofa ma aso fiafia, e pei foi ona fai meaalofa ai le polokalame a le ‘Faaolaola lou Uluai alofa’ i se ‘aiga tele na saunia faapitoa mo ana paaga ma le aufaafofoga i luga o le leitio, i le Aso Sa na se‘i mavae atu nei i se fale‘aiga i Manukau.
O lenei polokalame pei ona silafia, e faia i afiafi o Aso Sa taitasi i luga o le Radio Samoa 1593AM, o loo agai tonu i le toe fafagu o le ola faaleagaga, i upu timai auā le toe faaolaolaina o le uluai alofa. O taliga fesili faale-Tusi Paia ma feau faamalosi mo le faafofoaga a le lautele.
O se valaaulia na faatasitasi uma ai nai tina ma tamā matutua o paaga a le polokalame. O susuga lava i Feagaiga taulagi o loo faafoea le polokalame i luga o le alaleo, le susuga Oneone Okesene ma le susuga Taliaoa Filipo Tipo‘ai na faafeiloaia le susū atu o le mamalu o le atunuu ma le faagasologa o le polokalame o lea aso matagofie.
Leitioa a saafi le faisalamo, ‘se mea ina a lelei o uso, ae nonofo faatasi’ ua o se aiga e tasi le faatasiga, e ui e lē mafuta i aso uma, o se taimi muamua foi lea ua feiloai ai paaga a le polokalame ma le auevaeva a le leitio, ae o se vaaiga matagofie le taliē ma talanoa fiafia ua pei lava ua leva na masani.
Tele nisi o faafiafiaga na taualugaina le polokalame a o lei ta‘ape ma faamavae, aemaise le tufatufaina o meaalofa na saunia lava e le polokalame. O le po lava lea o le Aso Sa o le toe polokalame mulimuli lea a le ‘Faaolaola lou Uluai alofa’ i luga o le leitio, a o lei tuua mo faiga malologa o lenei foi tausaga.
E momoli atu ai ma faamanuiaga o le Kirisimasi ma le Tausaga Fou mo le mamalu o le atunuu, o paaga ma uo mamae a lenei polokalame ma le faamoemoe o le a toe taliu mai i se taimi o le tausaga fou.