“Faalumaina Samoa i tusi a le Palemia ma le Fofoga Fetalai”…Palusalue

“Ua matou iloa e lē na o le pau lea o se faamasinoga e aafia ai ni solitulafono tau moliaga o feusuaiga matagā ua ave ai se tusi a le Palemia i le faamasinoga e faailoa ai itu lelei o se tagata o loo molia”.  O le finagalo lea o le afioga Palusalue Faapo II le taitai o le Itu Agai poo le vaega faaupufai o le Tautua Samoa ona o lipoti i le faamasinoga o le alii Samoa o Fatu Seti ua nofosala i le falepuipui i Niu Sila ina ua faamaonia ona moliaga o le faia o se fesusuaiga fai faamalosi le rape i se tamaitai.

 
Na tapa ni tusi poo reference a le Palemia Susuga Tuilaepa L Sailele Malielegaoi ma le Fofoga Fetalai o le Palemene le susuga Laauli Leuatea Polataivao, mo se iloiloga faaiu a le faamasinoga a o lei faia sana faaiuga. Ua faailoa ai i ia tusi ni lagona o le Palemia ma le Fofoga Fetalai na tatalo ai i le faamasinoga maualuga a Niu Sila mo se faaiuga alofa i le alii o Fatu ona o se aseta tāua a Samoa i lana taleni o le faafiafia siva ailao afi e pei ona sa galue ai i le ofisa o tagata tafafao a Samoa, a o lei toe pueina ma avatu faapagota i Niu Sila e tali i ona moliaga.

 
“Ua aliali nei i le lalolagi i tala ma lipoti ua salalau e lagolago e taitai o le Malo faiga solitulafono matagā, ma sa lē tatau lava i le Palemia ma le Fofoga Fetalai ona la talia se talosaga a lea tagata mo se tusi e faaaliali atu ai ni ona lelei, auā e tasi lava le faauigaga a le faamasinoga a Niu Sila, e lagolago e taitai o Samoa faiga faapea”.

 
Faaalia foi e Palusalue ua faalumaina ai ma le atunuu. E lei maua se finagalo o le Palemia i le lagona ua faaalia e le Itu Agai, ae o se tau mātau atu i moliaga o tagata e faamaonia e se faamasinoga e tapa ni tusi mai faifeau poo se pulenuu i Samoa e faailoa ai ni itu lelei faasino i se tagata ua solitulafono ona ave lea i le faamasinoga e silasila i ai mo le faia o sana faaiuga. E iai foi le talitonuga na mafua se tusi a le alii Palemia ona o ia o loo avea nei ma Minisita o le Pulega o Tagata Tafafao.

 
E iai le talitonuga o le mafuaaga foi lea na tuuina atu ai tusi a le Palemia ma le Fofoga Fetalai i le faamasinoga o le alii o Fatu Seti lea ua nofosala nei i le valu tausaga i le falepuipui. Na sola ese ma Niu Sila le alii o Fatu ma foi atu i Samoa ma nofo ai mo le valu tausaga, lea na toe maua i sailiga ma faafoi atu ai e tali i ona moliaga.

 
E alu ese le taulealea o loo galue i se faletalimalo ina ua tuanai ni tausaga sa galue ai i le ausiva a le Pulega o Tagata Tafafao. O le faamasinoga o se tasi o alii pese lauiloa o Samoa le susuga Peti Key na molia i le faaoolima matagā na folasia ai foi se tusi a le alii Palemia sa faailoa ai itu lelei ma agavaa tāua o lea tamafanau a le atunuu a o lei lauina se faaiuga mo sona faasalaga.

Le taitai ma le sui taitai o le Itu Agai i se feiloaiga ma tusitala lea na folasia ai se lagona faanoanoa o le Itu Agai i le folasia o lipoti ua ta‘ua ai ni tusi a le Palemia ma le Fofoga Fetalai na lagolago ai itu lelei o le alii o Fatu Seti ua faamaonia e le faamasinoga maualuga a Niu Sila ona moliaga o le faia o se feusuaiga fai faamalosi ma se tamaitai