Faalototele atili tamaitai o Aukilani i Saute e ala i teuga

O se polokalame fou na faalauiloaina i le vaiaso ua tuanai, ua avatu ai i tamaitai o Aukilani i Saute se faamoemoega, o lagona mautinoa ma faalototeleina ai mo nisi mea tetele.

O se tasi o polokalame tau a’oa’oga i totonu lava o Aukilani i Saute, le Ignite College sa galulue faatasi  ma le Dress for Success Auckland, o se vaega e faia galuega alofa (charity) o loo saunia lavalava mananaia e aunoa ma se totogi, e latou te lagolagoina foi ma a’oa’oina tamaitai ina ia mafai ona maua ni galuega ma faamautu ai loa ni tomai faapitoa mo se galuega mautu poo ni careers.

O le aso 31 o Iulai na faataunuu ai lenei faaaliga o laei lea e silia i le 200 tagata sa auai atu e maimoaina lenei faamoemoe.

O se uluai faaaliga lea ua faia e le Dress for Success Auckland i le faaitu i Saute o Aukilani, ma na ta’ua e le Pule Sili ia Margot Minett Earwaker, ua na’o se amataga lea o nisi mea se tele o le a mulimuli mai.

Ta’ua e le Pule Sili lona matuā fiafia ona o le uluai taimi lea ua fai ai e le Dress for Success se faatau pa’ū faapea i le faaitu i Aukilani i Saute, ae ua matuā faafiafiaina i le tali mai a le mamalu o le atunuu.

E toatele tagata na lolofi atu ma faailoa o latou lagona fiafia i lea afiafi. Ua leva ona iai le fuafuaga a le Dress for Success mo le fia aumai o lana auaunaga i le itu i Saute o Aukilani, ae i le vaai atu i le taupati mai o tagata i lea afiafi e opogi le faamoemoe, o se amataga lelei tele lea mo latou, aemaise foi o lea ua iai lenei faiga faapaaga ma le Ignite Colleges.

E toaiva tamaiti aoga ma le sui e toatasi o le aufaigaluega a le Ignite Colleges sa auai i le faalauiloaina o le tele o laei faapitoa na saunia e le Dress for Success.

O Sui Vili, o loo a’oga mo le mataupu o freight and logistics, na ia faaalia, o se avanoa sili lea e atili tapu’e ai ona lagona mautinoa ma lagolago atu ai foi i se taumafaiga aogā.

Ta’ua e le tina ua toalima lana fanau mai Papatoetoe, “I ni nai vaiaso talu ai, na ofu ai e lo’u niece se ofu mai le Dress for Success mo le agai atu mo sana job interview, ma na maeu le lalelei o le tamaitai i le laei na ia ofuina, na matuā onomea ai lava mo lena faamoemoe.”

Na ia ta’ua atili, “O matou e tele i ofu e ofu i mea faasamasamanoa ma ofu lotu, ae leai ni ofu mo ni mea faapitoa faapea e pei o interview.

O a’u foi o se tagata e matamuli tele ma sa ou matuā popole i lo’u iai i se mea faapea o se faaaliga o teuga, ae ua ou iloa nei, o le Dress for Success o se faalapotopotoga lelei tele e tatau ona lagolago atu iai.

Na latou faia muamua sina a’oa’oga mo matou i le auala e savavali ai a’o faalauiloa lavalava (catwalk), ma faasinosino mai foi ia matou ituaiga o lanu ma sikaili o lavalava e sili ona fetaui lelei mo matou.

Na avea na a’oa’oga ua mafai ai ona ou maua le lototele ma le to’a.”

Na faailoa foi le agaga fiafia o le tamaitai o Amanda Papalii Taimalelagi o loo galue i le Radio Samoa i nei faafetauaiga o lavalava i le mananaia o laei ae na’o le $5 i le ofu.

O le Ignite Colleges o loo galue malosi nei i ni auala ‘anoa i le komiuniti i Aukilani i Saute, ma o lenei faamoemoe sa tulai mai ua maua ai ni avanoa tāua poo avanoa lelei mo latou.

Na faailoa foi lagona fiafia tele o le susuga ia Jasbir Kaur o le General Manager o le Ignite Colleges i le galuega ua fai nei e le Dress for Success, ma e toatele foi o latou tamaiti aoga ua fiafia e faaaogāina lea tautua.

Ma o lenei faamoemoe sa faatinoina o se avanoa lelei sa latou fesoasoani ai e faafesootai atu le Dress for Success i tamaitai i Aukilani i Saute o ē o la latou manuia mai ai i lea foi auaunaga.