O loo ua faatalia nei se faaiuga tusitusia a le Faamasinoga Maualuga i Aukilani, (Liquidation Order) e polili ai lana faaiuga ua mae‘a ona tolaulauina i le mataupu i le va o itu e lua o le Ekalesia Faapotopotoga Kerisiano Samoa i Westmere. O le aso 28 o Fepuari o le tausaga nei lava, o le aso mulimuli lea sa toe fofogaina ai lea lava mataupu i luma o le faamasinoga, ma sa faia ai loa ma se faaiuga o le mataupu. O le faaiuga e faapea, Ia faaliusuavai loa, pe ia faatau ese meatotino a le ekalesia, mo le faamalieina ai o itu e lua.
O meatotino a le ekalesia e aofia ai le Malumalu tapuai, o le maota o le galuega e pei ona alala ai le Faafeagaiga, o le fanua ma nisi lava o vaega o loo ta‘ua ai le igoa o le lotu. O lona uiga i le maitau i ai i le taunuuga o le faaiuga, o tupe uma o le a maua i le faatauina ese o ia meatotino, o le a vaeluaina foi lea mo itu e lua e tusa ai ma le tulafono. O se faaiuga atonu sa lei mafaufauina e le toatele o tagata lotu, ma taligata i nisi o itu e lua, ae sa matuā talitualimaina foi e isi, ona talu ai, ua leva ona faatasina ma fefaataaloloai le mamalu i tamalii ma failauga faapea muliauma eseese o le ekalesia, mo le fia maua o se mapusaga ma se fofo o lenei faafitauli.
E lē gata i lea, a ua agai foi ina ila, vaivai ma ua faasolo ina mativa i le itu tau seleni, talu ai totogi o Loia ma isi tupe faaalu, atoa ai ma taimi o tagata, i taimi uma e fesagai ai i luma o le faamasinoga. Ua silia ma le ono tausaga o faia pea lea finauga, ma fetosoa‘i faapa‘utolo a loi le mataupu lenei, peitai o lea faatoa masuiga mālie ma maua le tali. O se pepa o faamatalaga mai se tasi ofisa o Loia sa tulai mo lea mataupu, sa ta‘ua ai e faapea o se taimi o le masina nei e tatau ona maua mai ai lea faaiuga tusitusia e pei ona tālia nei. O le a mautinoa ai foi i lea faaiuga a le faamasinoga poo ai le ofisa o Mavaega o le a faatonuina e nafa ma le faatauina atu o meatotino uma a le ekalesia. Ae i se tasi o faamatalaga sa ta‘ua e le sooupu a le tasi o itu o le faamasinoga, le tofa ia Pa‘u Tafaogalupe Mulitalo, sa ia ta‘ua ai le taufaaofi ai o se talosaga a le Ekalesia Faapotopotoga Kerisiano Aoao mai Samoa, agai i le faamasinoga.
O lea talosaga sa ta‘ua ai e faapea, ina ia toe tolopo pe faateletelegese le faia o le faaiuga a le Faamasinoga Maualuga, ae se‘i toe taumafai e fofo alamea le mataupu a itu e lua. O lona uiga o le toe aapa mai o le Ekalesia Aoao i Malua mo se faaleleiga, o loo iai le talitonuga, ina ia avea ma auala e toe tafa pe toe suia ai le faaiuga ua faia e le Faamasinoga. E ui i lea talosaga, peitai e foliga mai, ua moni ai le alagaupu faasamoa e faapea, ‘Ua sau Apaula ua tautua Vaea’, ma ua tuai tele mo le toe suia o le faaiuga a le faamasinoga.
E faapea se faamatalaga, sa afea foi e le Faamasino sa ia tauavea le faamasinoga e faapea, ua leai se avanoa e toe tilotilo ai le faamasinoga i le talia o lea talosaga. O le finagalo o le Faamasino sa ia faailoa, ua leva foi tausaga a o faagasolo lenei mataupu, ma sa tele foi ni taimi sa tuu avanoa ai le faamasinoga mo se leleiga a itu e lua, a o lei faia e le Faamasinoga sana faaiuga i le mataupu peitai sa leai lea. O le toe faaofi o se isi talosaga faapea e pei ona faato‘ai ai mai le nofoaga autu o le EFKS i Samoa, ua tuai.
O le a tulituliloa pea e le Samoa Times, ma mata‘itūina le isi aso e toe fofoga ai itu e lua o le faamasinoga mo le tauaaoina o le faaiuga tusitusia ma aloaia ai loa lea lava faaiuga. Ae lē gata i lea o le a mautinoa ai foi pe na amanaia ma fai ni ai o le talosaga a le Ekalesia Aoao, pe o le a faataunuuina ma faamausali le faaiuga a le Faamasinoga Maualuga i Aukilani.
O fea sa iai le Ekalesia Aoao? Aisea faatoa talosaga ai mo se leleiga a ua tuai?
O se tasi lea o vaega ma‘ale‘ale tele o le mataupu a Westmere, e pei ona sa fesiligia ai e le toatele o nisi, ona o le faaumiumi tele ona faagasolo ma lōtea e le Faamasinoga le mataupu faalotoifale a lea aulotu. Sa oo lava foi i le sui o le Samoa Times, sa fesiligia le toeaina sa tulai ma tauavea le tofiga toeaina o le Matagaluega i le vaitaimi tonu sa faatoa fotuai mai ai lea vevesi, ma oo ai i le faamasinoga. E lē gata o le toeaina o le Matagluega, a o ia foi sa taitaifono o le Fono a Toeaiina o le Ekalesia.
Peitai sa lē matuā manino se faamatalaga sa ofoina mai ina ia faamalieina ai le toatele. O le saunoaga a le toeaina sa faapea mai, e iai tulaga faigata o le mataupu e mafua ai ona lē aapa mai le Ekalesia Aoao ma lana Fono i Samoa. O lea foi tulaga e ao ina mulimulitai foi i ai lona sui e ui ona o ia o le Taitaifono. E lei mautinoa lava la, poo ā itu faigata e pei ona sa atugalu i ai le toeaina. Ae ina ua fesiligia e le Tusitala le Loia sa tulai muamua mo lea mataupu, sa manino ai e tusa ma saunoaga a le Loia e faapea, o le aulotu i EFKS i Westmere, sa faagaioia i lalo o se faamalu (Trust).
O lea faiga, o lona uiga e lē mafai ai ona aiāina mai pe pulea mai e Malua ma le Ekalesia Aoao i Samoa meatotino a le EKFS i Westmere. O le Trust e pei ona pulea Westmere, o loo iai ona sui poo Trustees, o latou foi ia o loo umia le pule o meatotino e pei ona vevesi ai nei. O le tasi foi lea o vala o le mataupu sa finauina ona talu ai sa lē mafai ona sainia e le isi sui sinia o le Trust, poo le isi Trustee o le aulotu se aiaiga o se maliliega, e faataga ma faamaonia nisi o nonogatupe o loo tuua‘ia ai le Faifeau ma nisi o sui o le Trust, poo le Fono Faatonu.
Leai Loia Samoa sa tutū mo itu e lua o le faamasinoga
E pei ona silafia, o le afioga ia Leulua‘ialii Olinda Woodroffe sa tauaveina le isi itu, a o Leatigaga Simativa sa tulai mo le isi itu. E oo mai i le tau faaiuiuga ma tolaulauga mulimuli o lenei mataupu, ae ua lē toe nofoia e ia tamalii Samoa poo susuga i Loia Samoa, o la nofoa mo le finauina o la itu e lua e pei ona sa amata mai ai. E oo mai i le taimi nei sa taumafai atu pea i sui o itu e lua, itu tagi ma le itu tetee, poo le ā se mafuaaga ua lē toe faaauauina ai e ma loia o la tiute tauave ona ua leva foi tausaga ma tele taimi ua tuanai sa la finauina ai le mataupu. O le tasi lea o tulaga sa tau faafaigata ai nisi o talosaga ma fesili sa tuuina mo le faamasinoga i le taualumaga o le mataupu, ona ua suia loia ua faamae‘aina le finauga.
