Ua tele le faaletonu o le tala o le tupe a le Malo talu mai le fesuiaiga o faiga o lafoga totogi lea na faapa‘ū ai e le Malo a John Key lafoga totogi a latou e tele latou tupe maua aemaise le faapa‘ū o lafoga totogi a le aufaipisinisi ma kamupani tetele.
O le mea ua tupu, ua le lava tupe maua a le Malo mai lafoga totogi. Sa faamoemoe le Malo ia faaaogā e pisinisi ma kamupani le faapa‘ū o lafoga e atina‘e ai latou pisinisi, maua ai galuega, ma manuia ai le tamaoaiga o Niu Sila. Peitai ane, o nei pisinisi ma kamupani ua ave latou tupe ma inivesi i atunuu o i fafo.
Talu ai ua laitiiti tupe maua a le Malo mai lafoga ua faaletonu ai vaega tupe a le Malo mo polokalame masani oloo auauna ai le tele o matagaluega e pei o matagaluega o fale, matagaluega o le soifua maloloina, aoga, ma le matagaluega fesoasoani tau penefiti.
Ua faaaogā e le Malo lea mafuaaga e finau malosi ai ina ia faatau ese le tele o aseta tāua a le Malo, e pei o kamupani gaosi eletise e fa, ma le kamupani vaalele o le Air New Zealand.
Fai mai le Malo, e lelei le faatau ese o ia aseta ma aumai le tupe e maua e faaitiitia ai le aitalafu a le Malo. O le faaletonu o lenei fuafuaga, e faatau ese loa nei aseta e le toe maua mai, ma muta ai foi lea alagatupe maua a le Malo.
O nei faiga a le faigamalo a John Key ua faailo ai faaletonu e ono tulai mai i le lumanai i le tala o le tupe a le Atunuu, aemaise lava i le faatupeina o le tele o auaunaga masani a le Malo e pei o le penisione mo tagata matutua o le a maloloina ritaea.
I le isi 4 tausaga o i luma e atoa ai le $12.4 piliona tala le tupe e faaalu mo le totogiina o penisione a tagata matutua. E tutusa lelei le aofai lea o le $12.4 piliona tala, ma le aofai oloo faaalu i le tausaga mo le faatupeina o aoga uma e amata mai lava i aoga faataitai, seia oo i aoga maualuga o iunivesite.
O le lipoti ua aumai e le Matagaluega a Tupe a le Malo (Treasury) o le a toe faaopoopoina le isi $12.4 piliona e manaomia e faatupe ai le totogiina o penisione a tagata matutua i le isi 40 tausaga o i lumanai.
O lea lipoti oloo faapea mai – o le mafuaaga o le a toe manaomia ai le isi $12.4 piliona mo le faatupeina o le penisione mo tagata matutua i le isi 40 tausaga o i lumanai – ona oloo tuputupu a‘e pea i luga o fuainumera o tagata matutua o le a oo i tausaga e manaomia ai le penisione.
E le gata i lea o le a toaitiiti fuainumera o tagata faigaluega i Niu Sila e faigaluega ma totogi lafoga e tausi ai le faatupeina o le penisione ma le tele o isi auaunaga masani a le Malo.
Oloo faapea mai lenei lipoti o le taimi nei oloo 5-6 tagata faigaluega oloo mafai ona faigaluega ma totogi lafoga auā le totogiina o le penisione mo latou oloo agavaa mo le penisione.
Peitai ane, i le isi 40 tausaga o i lumanai, na o le 2-3 tagata faigaluega o le a faigaluega ma totogi lafoga e faatupeina ai le penisione mo tagata matutua.
O le fautuaga ua aumai e le Retirement Commissioner poo le Komesina o Tagata Matutua ua Faamaloloina, ua faapea – ua tatau ona tapena galuega mo le siitia o le tausaga e maua ai le penisione ia oo atu i le isi 20 tausaga o i lumanai, ua agavaa tagata matutua i le penisione i le atoa lea o le 67 tausaga le matutua.
E matuā teena e John Key le siitia o le tausaga e agavaa ai le tagata matua i le penisione, ma ua fai mai lava ia e tumau pea i le 65 tausaga, ma o le taimi lava e siitia ai tausaga mo le agavaa o le tagata matua i le penisione, o le taimi foi lea e faamavae ai.
O le upu moni lava e le o taitai popole i ai John Key i lenei mataupu auā oloo tele ana tupe. Soo se tagata lava e tele ana tupe e le popole i se penisione. Pau tagata e tatau ona popole ia iai se penisione o tagata matutua e vaivai le tamaoaiga.
O le mafuaaga lea ua faatalanoaina ai pea lenei mataupu e le Itu Agai, ona o le naunautaiga ia agavaa uma tagata matutua mo se penisione i tausaga e maloloina ai i latou mai galuega.
O le faavae e tatau ona tapena i ai ni faiga ia agavaa uma ai tagata matutua mo le penisione, muamua ia faatutusa uma tagata (fairness) mo le agavaa i le penisione.
Lua, ia gafatia e le Atunuu le totogiina o le penisione (affordable). Tolu, ia fuafua mamao ma ia umi se taimi e sauni ma tapena uma ai le Atunuu (sufficient time for transition) mo fesuiaiga.
E le gata i lea ae ia tapena lelei ni fuafuaga e fesoasoani ai mo latou e lei ausia tausaga matutua e pei o tagata Maori, Pasefika ma tagata oloo faigaluega i galuega mamafa.
Fa, ia agavaa uma tagata faigaluega i se teugatupe faamalosia e sao i ai kamupani ma pisinisi e fesoasoani i tagata faigaluega (compulsory savings), e pei ona iai le NPF i Samoa mo le aufaigaluega. Ma o ia teugatupe e fesoasoani i le taimi e malolo ritaea ai tagata matutua.
Afai tatou te le uia ia auala, ua faapea mai nei lipoti, o le a lē gafataulimaina e le Malo ona faatupeina le penisione oloo maua nei mo tagata matutua e ritaea i tausaga o i lumanai.
Pei ona ou fai atu, e le taitai lava popole i ai tagata milionaea e pei o John Key i lea mataupu. E oo atu i le isi 20 tausaga o i luma oloo pati mai Key i Atunuu mamao, a o tatou o le Atunuu oloo vaivai tupe maua, o tatou e tatau ona saili pe faapefea ona agavaa uma tagata mo le penisione i taimi ua tatou matutua ai ma malolo mai galuega.
