Faaletonu le taitoafitu ua taaalo manunu‘a tama

O le tau faaiuiu ai o le taamilosaga o le Taitoa 7 a le Pulega Faavaomalo o le Lakapi le IRB ua ta‘ua ai e le Alii Palemia o Samoa, le Taitaifono foi lea o le Iuni Lakapi a Samoa, e tatau i le ‘au a le atunuu ona vaavaai e tau see i luga atu o le tulaga fā o loo iai nei e ui ua mamao tele le alu a Niu Sila ua lē mafai ona toe tuli le tulaga muamua o le taamilosaga.
O le manatu o le Taitaifono, sa lē tatau lava ona faataalo e le alii faiaoga o le Manu Samoa i le taitoa 7, Tuisa Faamaoni Lalomilo tama o le ‘au ia na ia maua mulimuli faamatalaga na faataaalo lava ae o loo manunu‘a.
Faaalia e le Taitaifono ua tatau ona fai se faaiuga a le faiaoga ma le pulega o le ‘au e aveese mai i le ‘au alii e toafā ia e manatu e tatau ona aveese pe a fia see i luga taumafaiga a le ‘au.
Sa fesiligia le afioga ia Tuilaepa poo ai tama taaalo e toafā nei e faatatau i ai lana saunoaga ae sa ia saunoa, o loo silafia lava e le atunuu i le latou matamata ma maimoa i le vae lea ua mae‘a atu i Iapani.
“O lea ua toe lua vae o le taamilosaga o totoe mo lenei tausaga, ma e lē toe mafai ona toe maua Niu Sila auā ua mamao lava i luma le latou ō, ma e pau le tulaga e fai e le faiaoga, o le unaia pea o le taaalo a tama o le ‘au lea e lelei, ina ia see atu ai i luga i le tu tolu poo le tulaga lua,” o lana saunoaga lea.
Sa ia ta‘ua e faapea, o le taimi nei ua lē toe iai ni vaalele o le tatou ‘au na o laumei mea ia e totoe, ma o tama uma lava e silafia e le faiaoga ia Tausa Faamaoni Lalomilo o loo manunu‘a ona faamalolo lea ma le tele o le faaletonu o le ‘au.
“O lea faato‘ā ou iloa na lavea foi le tama lea o Paul, ma sa lē tatau lava i le faiaoga ona ave le tama lea ae faamalolo se‘i faalelei muamua ona ponaivi,” o lana saunoaga lea.
O le taimi nei e lei maua se feiloaiga a le taitai o le atunuu ma le faiaoga ma le pulega a le ‘au taitoafitu, lea na ia saunoa ai masalo o se taimi o le vaiaso lenei o le a talatalanoa ai mo le agai i luma o le ‘au mo isi vae e lua o loo totoe o le taamilosaga taitoafitu.