“O le faigata lea o le a feagai ma outou o le saolotoga, ua leai ni tou mātua e faamanatu atu ia te oe na e alu atu e sue le poto ona toe foi mai lea e tautua le Malo, aua nei tou manatu tou te faitogafiti, o le isi ua ‘alo i le ma’i, ua tou ‘ai pia, ua tago i le maruana, tou te lei o atu e sue ni tou taitoalua”.
O se vaega lea o le saunoaga a le afioga i le Palemia susuga Tuilaepa Lupesoliai Sailele Malielegaoi, i le sauniga masani a le Malo mo fanau ua faamanuiaina le taumafai i le vasega amata o a’oa’oga faaiunivesite ma ua maua togi maualuluga e avanoa ai i le fesoasoani a Ausetalia ma Niu Sila e totogi ai a latou a’oa’oga sikolasipi i fafo.
E lei ‘alo le palemia i ana upu tuusa’o na momoli ai le feau i tama ma teine e 127 ua maua ia avanoa sikolasipi ona o le naunautaiga o le Malo ia iu manuia lo latou taumafai ona taliu lea i le atunuu e faaaoga ai o latou tomai e tautua ai le Malo.
“E iloa uma atu lava iinei tou mea na e fai, tafafao vale, ‘ai pia, le mea lea na fautua atu ai le faifeau, aua tou te tago e faata’ita’i, le tago i le ‘ava, o mea na tou te tago loa iai faaletonu loa le taumafai”. Na saunoa foi le palemia o le tasi o faafitauli faigata o le fai uo o fanau ma iu ina faaletonu ai ma le a’oga.
“E lelei a le puipuia nai le togafitia, e te faaletonu loa o a’u lea e taitaifono ma le komiti uma a lea o le sikolasipi o matou uma sai o, nei tei ua e faapea matou te leiloa, e leai se mea o mea na matou te lei faia, e te faaletonu mai loa tu ma le pelu i lou patua toe faafoi mai oe”. O le 127 o fanau ua maua sikolasipi e toa 79 o fanau sa aooga i le Iunivesite aoao a Samoa i le vasega faavae poo le foundation.
O le polokalame fesoasoani a Ausetalia e totogi ai fanau mo iunivesite latou te filifilia i lea atunuu e aooga ai faapea ma fanau e a’oa’oina i le Iunivesite a le Pasefika i Fiti. O isi ua maua avanoa i iunivesite i Niu Sila, ao le isi vaega e aooga i fesootaiga tau initaneti poo le online education agai i Ausetalia ae faamatu lava i Samoa.
Na faailoa e le Palemia i lana saunoga se faiga fou na amata ile tausaga ua mavae e le Malo o Niu Sila o le talosaga lea o fanau mo ni sikolasipi e faaaoga ai fesootaiga initaneti. Peitai na saunoa Tuilaepa ma ia fautua i le Malo o Niu Sila e taofia lea faiga ona ua iloa ai nisi tulaga le lelei i le filifilia o fanau.
Na faailoa e le palemia e lata i le 20 tamaiti e maualuluga togi na talosaga ae e lei avea iai se avanoa sikolasipi.
O fanau ia ua totogi e le Malo o Samoa a latou a’oa’oga i Niu Sila ma o le a faaalu ai se tupe e silia i le ‘afa miliona tala Samoa. E lē o mafai ona maua i sailiga pe toafia fanau a le atunuu sa maua ia avanoa sikolasipi i le lima tausaga ua mavae, sa faaiuina ma le manuia le taumafai, ae pe toafia foi e lei taunuu i le sini o le taumafai.
