O alia fagota na faaleagaina i le galulolo e pei ona iai se polokalame fesoasoani a le Malo mo le toe fausia, ma faaleleia foi alia fagota na iai ni vaega na faaleagaina i le sunami, ua faapea ona tauaao ai i nisi o le au faifaiva e to‘a 15 na aafia vaa i lea faalavelave faalenatura, alia fou e 6 ua mae‘a ona fausia.
Ua o faatasi lea fesoasoani ma le polokalame o le toe faaleleia o punaoa tau faigafaiva, i ogasami e aofia ai aloalo ma aau e ala lea i le toe totōina o le amu, toe faasoa atu i ai figota e pei o ali‘ao ma faisua sa auina mai i atunuu i fafo e faafailele i totonu o lo tatou atunuu ina ia faatupulaia.
O lenei galuega toe faaleleia, o loo faasopolia ai ma gataifale o afioaga ma alalafaga o lo tatou atunuu e lei faaleagaina, e pei o le toe fausia o faailoilo e faalauiloa ai gataifale faasaoina, auā le malupuipuia mo le faateleina o i‘a maua.
Ua faaalia e le Minisita o Faatoaga ma Faigafaiva, le afioga Tauā Kitiona Seuala o loo faagasolo foi le toe faaleleia o mea fagota a le au tautai o loo faaaogāina upega, paopao, matatao faapea ai ma le tele o nisi auupega mo le faafaigofieina o fagotaga.
O vaa fagota uma ua toe faaleleia, ua faaopoopo i ai ma o latou afi o le malosi e 40horse power.
E tusa ma le 1.5 miliona tala le tupe ua faaaogāina e le Malo e faatinoina ai lenei fesoasoani.
Na saunoa le minisita, o le faamoemoe autū, poo le fu‘a taualuga i le faatofalaiga a le Malo, ia faaleleia pea fagotaga i le sami loloto, auā o le tasi lenei o atina‘e tāua o loo maua mai ai tupe a si o tatou atunuu.
Ma e talosagaina e le Matagaluega le autautai ua faamanuiaina i lenei fesoasoani, ina ia tausisia pea taiala a le Matagaluega o Faatoaga ma Faigafaiva, e ala lea i le laiseneina muamua o nei vaa fagota, mo le saogalemu ma le malupuipuia o soifua o i latou o loo faaaogāina.
“O faigafaiva i le sami loloto, o le fesoasoani lea mo le au tautai o loo latou asaina le fita o le moana sausau, e toe faaleleia ai o latou alia fagota sa faaleagaina, aemaise vaega moomia mo fagotaga e iai afi vaa.
E iai la le taeao lenei na liugalua”, na saunoa ai le alii Minisita.
“O lea ua aofia moli i futiafu e tasi, tatou te molimauina lenei fesoasoani tāua e pei ona outou maimoa atu i ai.
“O le faamoemoe autū, poo le fua taualuga i le faatofalaiga a le Malo, ia faaleleia pea fagotaga i le sami loloto, auā o le tasi lenei o atina‘e tāua o loo maua mai ai tupe a si o tatou atunuu.
Ma, e talosagaina e le Matagaluega le autautai ua faamanuiaina i lenei fesoasoani, ina ia tausisia pea taiala a le Matagaluega o Faatoaga ma Faigafaiva, e ala lea i le laiseneina muamua o nei vaa fagota, mo le saogalemu ma le malu puipuia o soifua o i latou o loo faaaogāina”.
E pei ona silasila ma maimoa atu i ai, e 6 alia fagota ua mae‘a ona fausia, o le sauniga lenei e faalauiloa aloaia ai lenei fesoasoani.
O le manumanuga o le Matagaluega, ina ne‘i taligā i latou uma ua faamanuiaina se‘i mae‘a ona fausia uma alia e 15, ae avea lena ma lape mo nisi tautai ua fia faatino a latou fagotaga i le taimi nei.
“Momoli atu le faafetai tele i le Malo e tusa o lenei foai tāua, auā le faaleleia o faigafaiva i totonu o lo tatou atunuu”.
O le Aso Faraile, 29 Oketopa 2010 na tauaao ai uluai vaa e ono ua mae‘a ae o loo fausia pea le isi iva.
