E oo lava i le pue o lona ata mo le lipoti lenei ua na o le luelue o le ulu o le tamaitai o Angie (Andrea Faavae) i le fiafia ina ua faaleaoga e le Faamasinoga i Apia moliaga uma e 30 o le faia o faiga faatalitane na tuuaia ai o ia e Leoleo. “Sa ou lagona le mā ma le maasiasi ina ua faasalalau lo‘u ata i le taimi na molia ai matou. Sa sili ona ou maasiasi i lo‘u aiga ona ua ta‘u ai ma le igoa o lo‘u tama”.
O upu ia na masua mai i le fofoga o le tamaitai o Andrea Angie Faavae, ina ua fesiligia e se tasi o tusitala i sona lagona e tusa ai ma moliaga o le aafia i faiga faatalitane (prostitution) sa molia ai, faatasi ma isi tamaitai e toafitu.
“Ou te faafetai i leoleo ma la‘u loia ua mae‘a le faamasinoga ua faamamāina lo‘u igoa”.
“O le mea tāua lava ua aveese nei moliaga na faaleaga ai le igoa o lenei tamaitai,” o le talanoa mai lea a le tamaitai loia o Josephine Sapolu na galulue faatasi ma lona tina e tulai mo Angie faapea ai isi tamaitai e toafitu ia ua tuuaia i faiga faatalitane.
O le taimi muamua lea ua vaaia ai lenei moliaga ua faaaogāina i ni tamaitai se toatele i Samoa.
O isi tamaitai e toafitu ua faatonuina e le Faamasinoga Leoleo ina ia saisai mai.
O le isi toafā na ave lava i ai lea faatonuga i le lē oo atu atu i le Faamasinoga ae o le isi toatolu na tulai muamua ma le tamaitai lenei o Angie ae e lei oo atu i le Faamasinoga i le valaauina o lea faamasinoga, ia foi ua faatonuina le aumai faamalosia e Leoleo i lenei mataupu.
O le faaiuga a le Faamasinoga ia Angie e foliga mai e ono maua uma foi e tamaitai nei sei vaganā ai se isi tamaitai na taua e le Afioga Alo Vaemoa Vaai le Faamasino o loo faatautaia lenei mataupu – o loo iai isi moliaga ese o loo feagai ma ia.
O le mafuaaga o le faaleaogaina o nei moliaga faasaga i le tamaitai lenei, e pei ona pueina lona ata ma le loia Josephine Sapolu, ona ua lē lava ni mau a leoleo e faamaonia ai ia tuuaiga. Faaalia e le tamaitai Loia o Josephine Sapolu, e faigata lava ona faamaonia nei moliaga ona o loo manino e leai ni mau e mafai ona faapea mai sa iai i taimi na faatino ai soligatulafono ma o lona masalosaloga ua na o faamatalaga lava ma tuuaiga ua faia ae e tatau ona aumai alii o loo faatauina le auaunaga lenei ua tuuaia ai tamaitai nei i faiga faa talitane.
Ae talu ai e lē o iai lava se alii o loo agai atu i leoleo e faamaonia ia tuuaiga ua le mafai ai loa ona faaauau ia tuuaiga.
O le faamatalaga a le Afioga i le Faamasino ina ua fesiligia le tamaitai loia o Iuni Sapolu, afai foi e lē o mafai e le Loia o loo tulai mo Leoleo i lenei mataupu ona oo atu e faaauau le mataupu i taimi e valaau ai o le a lē toe alu se taimi e faaauau ai lenei mataupu.
O isi tamaitai na ta‘ua e le tamaitai o Angie na ia logoina lava o ia o le a sau i le Faamasinoga ae ua leai se isi e toe fia oo ane ona o le matamuli i le tapue o o latou ata, o le faamatagā o i latou e pei ona ta’ua e nei tamaitai ae e lei faamaonia ni o latou moliaga. nei faiga talu mai lava le amataga o nei mataupu ua vaaia ai le fiu e talia nei tamaitai ina ia oo atu i le Faamasinoga ma o le faamatalaga a Iuni Sapolu ma lona alo tamaitai o Josephine e le tuuaia foi ia tamaitai ona o le faigata o nei tuuaiga faapea aemaise le ta’uvalea ai o i latou, aiga ma afioaga i lipoti ua faalauiloa ai nei moliaga.
O le auaunaga a Iuni ma lona ofisa Loia o le Sapolu Law Firm na ofo fua lava ina ua vaavaai lenei tamaitai i le auala na faalauiloa ai nei tamaitai ma tuuaiga na faia faasaga ia i latou.
O le Peresitene o le PPSEWA le faalapotopotoga o Tamaitai o le Pasefika ma Saute i Sasae o Asia, le susuga Papalii Dr Viopapa Annandale na lagalagaina lava lenei mataupu i tusitusiga i luga o le nusipepa ona o le auala na faalauiloa ai nei tamaitai ma le leai o so latou puipuiga ina ua taofia mo vaiaso e lua e tālia ai le faamautu o moliaga faasaga ia i latou.
Faaalia e lenei tamaitai le faafiafiaina ina ua aumai le faaiuga faasaga ia Angie ma ia ta‘ua ai e tatau lava ona toe vaavaai i le tulafono e faatatau i nei faiga ma ia maioio lelei ai le puipuiga o tamaitai e tuuaia i nei faiga ae o loo tuusaoloto lava alii. Ua talia nei le avatu o isi tamaitai e toafitu mo se iuga a le Faamasinoga.
