E lua moliaga o le lē usitaia o le faatonuga a le Faamasinoga na tuuaia ai le Afioga Leota Leuluaialii Ituau Ale i le tausaga na tea nei, ae o lea na iloiloina ma fai i ai le faaiuga a le Faamasinoga Faaitumalo i le vaiaso ua tea.
O le moliaga muamua ua tuua‘ia ai le Afioga Leota Leuluaialii i lona lē usitaia o le faaiuga a le Faamasinoga o Fanua ma Suafa e soloia lana faiganuu lea na fai ese mai i le faiganuu a le afioaga o Solosolo, ae agai lava fai le usu a “lana faiganuu” i le toe taliu mai o se faigamalaga a se isi matai e suafa ia Leota Tusi o Solosolo.
O le moliaga lona lua, ua lē usitaia lava le faaiuga lea a le Faamasinoga o Fanua ma Suafa e soloia lana faiganuu ina ua agai i le maliu o se isi foi sui o le afioaga o Solosolo o Lesina ma na faapea ona fai ai se tapuaiga a “lana lava faiganuu”.
O le iloiloga o lenei mataupu na finauina ai e le Afioga Leota Leuluaialii e ala i lana loia le afioga Toleafoa Solomona Toailoa, le faaiuga lenei ua soloia le faiganuu a Solosolo-uta ua taitaia e Leota Ituau Ale.
O le finagalo o le itu a Leota, e na o le pau lava lea o le faaiuga na tuuina mai ae e lē o maioio lelei poo ā tuutuuga o le nuu ae soloia. E leai foi ma se faamatalaga poo le ā le solitulafono ua fai pe afai e soloia le faiganuu lenei.
Faaalia e le tamaitai faamasino e lē o mafai e le faaiuga lenei a le Faamasinoga o Fanua ma Suafa ona maioio lelei mai ia faaiuga ma e tatau ona iai ni tuutuuga e ma‘oti ai le faauigaga o le faaiuga ua soloia le faiganuu a Solosolo-uta.
Ma e foliga mai i le faaiuga e lē o iai foi se gaioiga poo se teuteuga e mafai ai ona faapea ua solitulafono se tasi faasaga i lenei faaiuga ona o le lē manino lelei ona faataatia mai.
O lea la ua manatu ai le Faamasinoga Faaitumalo, e lē talafeagai le faaauau o moliaga o le lē usitaia o le faaiuga a le faamasinoga ona o mafuaaga e pei ona ta‘ua.
O le afioga i le faamasino le tamaitai o Mata Tuatagaloa na fofogaina lana faaiuga o lenei mataupu, ma na faaalia le agaga faafetai o le afioga Leota Leuluaialii Ituau Ale i lenei faaiuga.
O feeseeseaiga i le va o lenei tamalii ma le afioaga o Solosolo ua autausagā talu ona tulai mai ma e lē o manino foi la poo le ā le isi laasaga o le a savalia ona o loo taatia lava foi le mataupu lea na faapea ona tagi ai le afioga Leota Leuluaialii i sui o le afioaga na susunu ma faaleaga ona maota ma ana meatotino.
