O se tasi o tamā ua 63 tausaga le matua o le soifua, sa galue o se faifeau i se tasi o ekalesia Kerisiano i le atunuu, ua saoloto ma ua palasi ese se avega mamafa sa ia tauaveina, ina ua fulisia le laulau o faatonu poo assessors (jurors) e faalēaogā lona moliaga o le faiaiga fai faamalosi ma se teineitiiti e aafia lona mafaufau, poo se teineitiiti e iai ona manaoga faapitoa.
O le taunuuga lea o suesuega a le laulau o faatonu sa suesueina molimau a leoleo ma le molimau a lē na molia, lea faagasolo ona taualumaga i le faamasinoga maualuga i Mulinuu i le vaiaso ua mavae.
Ua taofia e le faamasinoga i se poloaiga le faalauiloaina o le suafa o lē na molia ona o le fia puipui i le tamaitai na aafia. Peitai o lea tamā ua matua le soifua, sa tuli sona faasalaga i le tausaga ua mavae i le solitulafono o le faia o ni gaioiga faaalatua ma le tau faasese, le fraud.
E tasi le tausaga na nofosala ai i le falepuipui, peitai na toe molia e leoleo i le moliaga ua soloia ma ua lē faamaonia ona o le silasila a le laulau a faatonu, ua lē lava ni molimau a leoleo e lagolago ai le tuuaiga.
O le ono tausaga ua mavae na tulai mai ai le tuuaiga faasaga i le tamā ma faia ai loa suesuega a leoleo ae taunuu i le faia o le moliaga o le toso teine poo le faiaiga fai faamalosi. O le molimau a lē na molia sa tutulu ai i luma o le faamasinoga, ma ia tautino na te lei faia le solitulafono.
O lana molimau tuu fofoga foi, na ia faaalia ai sa ia tausia lana fanau e toalima faatasi ma lona toalua ma tausi le teineitiiti na tuuaia ai e pei lava o sona afafine moni. O le faamatalaga foi a le tamā, e matuā leai ma se mea e tasi o molimau a leoleo na te talia ona e lē moni.
Sa ia faamatala i tusitala ina ua mae‘a ona lau le faaiuga, e pei ua matuu atu sana avega mamafa ina ua aumai le faaiuga ua lē faamaonia le moliaga. O lana faafetai ua tea ese se avega sa faamalumalu mai ona o le tele o aafiaga o lona aiga aemaise o lana fanau, ina ua alia‘e le mataupu ma
tuuaia o ia.
Ua ia faafetaia ai lana loia le susuga Leiataua Taii Jerry Brunt mo le tauaveina o lana mau tetee i le moliaga, lea ua iu ina tini ma aumai le faaiuga ua faamamā lona tagata mai le solitulafono na te lei faia.
O lē sa molia sa avea ma faatonu o se tasi o faalapotopotoga tumaoti faavaomalo sa iai lona ofisa i Samoa. O le galuega a lea faalapotopotoga o le faia o polokalame faalauiloa e tafiesea ai faiga tau feusuaiga solitulafono e aafia ai fanauiti, ma o le maota o le Malo i le eleele fou sa iai le ofisa o lea faalapotopotoga tumaoti faavaomalo.
