Ua tatou iai nei i le vaitau o le tau faaiuina o galuea faalea‘oa‘oga, ia ma o se vaega matagofie foi i le faafofoga ma le silasila a mātua le tali mai o nai alo ma fanau ia latou sailiiliga ma suesuega o lenei foi tausaga.
O nisi foi o Aoga o loo faagasolo pea polokalame auā le faalauteleina o mataupu a‘oa‘oina i totonu o potu aoga ma faapena ai ona maua avanoa lelei e asiasi atu ai i vaega ua faamautuina pei o le asiasiga a le vasega tasi (Year 1) mai le Aoga Tulagalua a Rorbertson Road i Magele i le Fale Mataaga i Aukilani le Aso Tofi na tea atu nei.
O lenei fuafuaga sa fai ma mataitu i le a‘oa‘oina o le mataupu tau i Maori, ma na faapena loa ona faalauteleina suesuega ma sailiiliga a le fanau i le latou malaga e maimoaina ma maitauina le faatinoga o nisi o tu ma aga a Maori i totonu o le Fale Mataaga (Auckland Museum).
O le mea sili ona matagofie, o le avanoa sa mafai ona maua e nai mātua na malaga i lea faamoemoe, ina ua latou molimauina le tāua ma le tatau lava ona faalauteleina mataupu a‘oa‘oina i polokalame a Aoga, e ala ia latou asiasiga e pei foi o lenei faamoemoe.
