E ui lava ua faaiu le 2012 i Samoa i mafatiaga o le afā o Evan, ae atonu o le a avea le oo atu o le Cool Gadget ma lana auaunaga faatau telefoni i Samoa, o le a toe faafoi mai ai ni lagona fiafia i nisi o le mamalu o le atunuu sa iloga ona tigaina i lenei mala faalenatura.
O le Cool Gadget, o le kamupani a le susuga Sunny Singh Sethi, ua tusa nei ma le 3 tausaga talu ona faagasolo lana tautua mo le faatauina o telefoni feaveai i totonu o Aukilani, ae o se kamupani ua 20 tausaga talu ona faagaioi i Ausetalia.
Ae o lea la ua a‘e nei se tofa i le alii faipisinisi, o le a aga‘i sa‘o loa lana auaunaga e faatulaga se isi lala i lo tatou atunuu i Samoa.
E tele ituaiga eseese o telefoni feaveai o loo faatauina e le Cool Gadget, ae o le taimi nei, ua amata foi ona tatala faalautele le kamupani a le alii o Sunny i nisi foi pisinisi ua ia faia i Aukilani, lea foi ua iai lana fuafuaga, o le a avatu uma lava na pisinisi e faatino i Samoa i se taimi ua lē o toe mamao nei.
O se fuafuaga ua leva ona moemiti i ai le alii faipisinisi, ina ia tatala lava se lala o le Cool Gadget i Samoa, ona o le toatele o ana paaga faatau i le faleoloa i Aukilani nei ma Ausetalia foi, o tagata lava mai le Pasefika, e iai Tonga, Rarotonga, Fiti, ae toatele lava la i tagata Samoa. O se tasi la o faanaunauga o Sunny ina ia faigofie ma vave ona tino mai lana moemitiga, o lona fia fesootai tonu lava ma fesagai ma i latou o faauluuluga o le atunuu, e pei la ona mafai ona feiloai ma lulu aao atu, e lē gata i le Ao Mamalu o le Malo, le Afioga i le Tamaaiga Tupua Tamasese Efi, ae na maua foi se feiloaiga ma le taitai o le atunuu, le Afioga i le Palemia, Susuga Tuilaepa Lupesoliai Sailele Malielegaoi, ina ua toe taliu mai le alii Palemia i le vaiaso muamua o Oketopa, i sana faigamalaga mai le malo tele o Amerika, ma faia ai loa se la feiloaiga auā le fia faatalanoaina o lona manaoga mo se lala o le Cool Gadget i Samoa.
Na talia lelei e le afioga i le Palemia le fanoga o le alii faipisinisi, auā na silasila le taitai o le atunuu, o se tasi foi lenei o auala e fesoasoani atili i le tamaoaiga o Samoa, pe afai o le a tatala lenei foi kamupani fou i le atunuu, ma maua ai foi galuega a nisi o o tatou tagata o loo fia maua ni galuega. Pau le itu sa moomia ona silasila muamua i ai e pei ona aofia i lena feiloaiga, ina ia saili lelei se nofoaga e faamautu ai le pisinisi i Samoa.
O le fuafuaga a le alii faipisinisi, ina ia tatala se lālā o le kamupani i Samoa, ae e faaauau pea foi le auaunaga ua faatulaga i Aukilani nei, ina ia maua ai pea fesootaiga lelei a atunuu e lua ma atili ai ona ola uma lala nei o le Cool Gadget.
O se taimi ua lē o toe mamao i le masina fou Ianuari poo Fepuari foi, ua tatau ai loa ona agai le Cool Gadget mo Samoa.
Ta‘ua e Sunny, e ui o le kamupani ua lauiloa i le faatauina o telefoni feaveai ma isi auaunaga faapea e faaaogā ai le computer ma initaneti, ae o le a faalautele atili atu foi isi oloa e mafai ona faatau atu e le faleoloa, e iai oloa tau le faatotogaina o maota ma fale, e pei o meaafale e iai pusaaisa, masini tamea ma le anoano o isi meafale faapena.
Talosia ia le oo atu o le Cool Gadget i Samoa, atonu o se isi lenei faamāmā avega o le a tulai mai e fesoasoani i nai o tatou tagata ua matuā tele le mafatiaga i lenei taimi talu mai āuga o le afā na mavae atu nei, lea ua tele ina faaleagaina ai a latou meatotino ma meafale uma.
