E silia ma le to‘a 300 le fanau o loo aooga i le aoga tulagalua a le afioaga o Foaluga i Savaii. O se tasi lea o aoga tulagalua toatele i totonu o le atunuu. O le mafuaaga lea o le agai o le aoga mo se fesoasoani ae na tagi sa‘o lava i le sui o le Ekalesia a Iesu Keriso o le Au Paia o Aso e Gata Ai i Foaluga lava, o ia lea na agai i le latou Ekalesia tele i lona ofisa o mataupu o le va i fafo ma faatalosagaina se fesoasoani agai i lenei galuega o le fia faalautele ai o le faleaoga a le nuu.
O le faaiuga o le vaiaso na tea nei, e ui i le louloua o le tau, ae na agai lava sui o le Ekalesia e fiafia faatasi ma le afioaga aemaise le Pule ma le vasega o faiaoga i le tino mai o le galuega na tutu faatasi ai le nuu ma le Ekalesia i le faatautaiga.
E $13,000 (tala Samoa) le foai a le Ekalesia a Iesu Keriso o le Au Paia o Aso e Gata ai na avatu i le komiti a le aoga ina ia fesoasoani ai i le faalautelega o le aoga e ala i potu aoga faaopoopo, o le faletusi ua aofia ai ma le nofoaga e gasese ai taumafa, o le nofoaga mo aoaoga faa computers ma le potu o faiaoga.
O se galuega na moomia ai se isi seleni mai i le nuu ma na saili tupe ma maua ai le $12,000.
Ta‘ua e le aoga na agai le komiti i le kamupani o mea faufale o le SMI ma tatala mai ai se aitalafu mo le aoga, e $15,000 (tala Samoa). O le tupe la lea o loo totoe e lei mae‘a ona totogi ae na taumafai lava ina ia vave ona aumai se seleni e faauma ai le faleaoga mo le fanau.
E tolu masina na faatino ai le galuega ina ua maua le aitalafu ma le tupe na aoina mai i le Ekalesia faapea ai ma le komiti a le aoga.
O le faafetai na fofogaina e le komiti atoa ai le aoga ona o le lagolago ua tuu atu e lenei Ekalesia i soo se manaoga ua talosagaina e afioaga i atinae i soo se vaega o Samoa e pei foi ona vaaia i le latou faleaoga.
O se sauniga puupuu na faatautaia i le afioaga o Foaluga ma na ave ai le faamamafa a le Ekalesia i le atinae o le tomai faaleaoaoga i fanau ma le mafuaaga ua unai ai pea le Ekalesia, poo ai lava e talosaga atu ina ia ave le faamuamua i aoaoga a le fanau i soo se itu o le atunuu.
