E ui ina ua laasia tausaga litaea mālōlō mai le galuega a le Atua, e pei ona tautua ai i tausaga e tele le faletua ia Tamasailau Sagaga Simanu, ae pei ona molimau le Salamo 92:14, “A oo ina ulusina, latou te fua mai pea lava; e malolosi ma lauolaola i latou.”
O se matatia ua ausia i le 63 ai o tausaga o lona soifua, e pei ona tusia ma lolomiina ai ni tusi se ono i se taimi e tasi, lea na feagai ma le faletua ia Tamasailau Sagaga Simanu poo Sailau foi e pei ona silafia ai e le toatele.
O le Aso Toonai na tea nei na faataunuuina ai se sauniga lotu faafetai, ma faalauiloa ai lenei taumafaiga.
O le sauniga na taitaia ma tatalo faamanuia ai le susuga i le faafegaaiga ia Rev Siitia Asi. Na auai aiga ma uo, o susuga i faafeagaiga ma o latou faletua i le ofisa o le Manukau City Council e molimauina ma faamanuia le faamoemoe.
O nei tusi e ono a le faletua, o nisi i le gagana Samoa, a o nisi i le gagana Peretania. O tusi nei na faalauiloa: ‘Believe in God’, ‘Faasoa mo le Atua’, ‘Modern Family Quotes’, ‘To God be the Glory’, ‘Devotions for Women’, ‘I le Taugagaifo o le La’. O le masina fou o loo faamoemoe o le a tuuina atu ai i faletusi ma faleoloa mo le faatauina atu i tua.
O saunoaga autū o lea aso na saunoa i ai le tamaitai faiaoga mai le Iunivesite o Aukilani, Dr Maxine Stephenson, o lē sa faiaoga i le faletua i le faailoga o le Tikeri o le Bachelor ma le Masters.
Na ta‘ua e le tamaitai faiaoga e faapea, e fesili lava o ia i le tele o taimi poo fea e maua mai ai le malosi o le faletua ia Sailau e faatautaia ai le tele o ana galuega e pei o le faatautaia o le Aoga Amata, o le avea o se faletua o le Ekalesia, o le vaaia o lona aiga, ma tiute faatina, o le faia o ana meaaoga aemaise le tele o ona tiute i totonu ma fafo atu o le aiga ma le ekalesia. Peitai na toe tali lava o ia i lana fesili ma ia mautinoa ai o le faatuatua ma le ekalesia sa maua ai le malosi.
E pei ona silafia, o le susuga i le faafegaiga ia Talaetau Reti Simanu ma le faletua ia Tamasailau, sa tautua i le galuega a le Atua mo le 28 tausaga, i totonu o le Ekalesia a le PIC i le motu i Saute, aemaise i Manukau, ma ua tatalaina nei le la feagaiga ma le Ekalesia ina ua litaea, ma ua avea ma Faifeau Malolo Manumalo i le tausaga 2009.
E tele ni molimau matagofie ma le faagaeetia e faatatau i le taumafaiga a le faletua. O se tasi o molimau o le susuga lea i le faafeagaiga ia Tala Simanu e pei ona ia tautino ai i le faigata o le taimi na feagai ai Sailau ma le galuega, ona sa feagai ma se gasegase faigata. Peitai, e lei avea lea ma ala na faavaivai ai le faletua i le ausia o le taumafaiga.
I se talanoaga ma le faletua, sa ia faailoa mai ai, e tele nisi ana tusi o loo ia galue ai nei, o le a mae‘a i le masina o Aukuso i le tausaga nei.
“O le tusitusi, ua pei o se vailaau faamālōlō, mo ē ua ausia le soifua litaea, ma o se auala lelei o loo faaaogāina ai lo‘u taimi mālōlō ma lo‘u mafaufau, aemaise o tausaga faaiuiu o le soifuaga”. O se faamatalaga lea na auina mai e le faletua ma ‘ata, ona e tausaafia lava ma ana tala.
“Ua manaia foi le mālōlō mai le galuega, ua mafai ai ona fai nei mea, ma vaai lo‘u aiga”, o le saunoaga lea a le faletua.
