“O le taleni na ola mai ona o si matou tamā, lea ua tauaveina e le tuafafine ma le uso i NZ i le saunia o viiga o le Atua, ae o a‘u ou te lagolago ona e ese la‘u taleni o le faafiafia”, Muagututia Lose
“O Taiwan o se isi lea o vaega o le atunuu tele o Saina o se uo mamae a Samoa. Peitai o Taiwan o loo pulea lava e ia ona upufai ma o loo finau pea e tuma‘oti ma avea ma Malo e lē pulea e Saina. O se tasi lea o vaega o Saina ua oo i ai taumafaiga a alo ma fanau a Samoa e ala i le faalauiloana o a tatou tu ma aganuu e ala i faafiafiaga e pei o siva eseese.
O se miti lea a se tasi o tamalii o le atunuu o loo alaala i Niu Sila ma lona aiga, le afioga Muagututia Lose Tominiko Mulipola, o lona tuaa (tamā) o Auapaau Tominiko Mulipola o Manono ua tuumalo, ae sa silafia e le ekalesia Katoliko i viiga o le Atua i Samoa, Tutuila ma Niu Sila. O lona tina o Rasela Vaioulu Hunt o Vaitoloa ma Leauvaa.
O le tausaga e 2009 na amata tuufaatasia ai e Muagututia Lose lana ausiva i le faamoemoe e malaga i Taiwan e faafiafia ai faatasi ma ausiva mai isi atunuu o le lalolagi e pei o Rusia, Kanata, Kenya, Filipaina, Amerika ma Saina. “O le ausiva na saili mai lava i tamaitai ma Alii i Niu Sila ma nisi, a o nisi taulelea sa saili mai Samoa i le tausaga e 2009 ma le 2010 mo Taiwan.
O le tausaga e 2010 na faamanuiaina ai le taumafaiga a lea tamalii i se konekarate mai Taiwan e ta‘ua o le Kuangzhou i China. O le tausaga nei 2011 na siitia uma ai le ausiva i Taiwan ma amata ai loa ona faafiafia.
Ua 3 ai nei tausaga o tautuaina e le ausiva a le Leviilage dance group Samoa i lona faalauiloaina o tu ma aganuu faa-Samoa i lea vaega o le lalolagi o atunuu Asia, aemaise o loo mafai foi e lea au faafiafia mai Samoa ona faatino siva a isi atunuu o le Pasefika.
“O se taumafaiga faigata tele ona e leai lava ma se fesoasoani tau seleni o maua mai ae ua tagi i lima i le fesoasoani mai o le Atua i galuega aemaise le fanau ua manuia ma iu aoga, ona e fai si taugata o le tapenaga i teuga faaatu motu eseese o le Pasefika ma Samoa”. O le faamatalaga lea a le susuga Muagututia Lose. Peitai o lona faamoemoe i lea atunuu o loo molimauina le faatumulia ai o le aumaimoa aemaise tagata tafafao eseese o le lalolagi e fia maimoaina a latou faafiafiaga.
“E faatumulia matou faafiafiaga i aso uma pe a faatusatusa atu i isi aufaafiafia mai Rusia, Canada, Kenya, Philippines, USA ma Saina o loo matou mafuta ma e eseese taimi ua faatulaga mo a matou faafiafiaga ma ua faasalalauina i leitio ma televise le maoa‘e o matou faafiafiaga e lē gata i le taleni a alo ma fanau a Samoa aemaise le felanulanuai o teuga eseese. E ‘afa itula le umi o le show ma e faatolu ona matou faafiafia i le aso e tasi ma le matou aso mālōlō e 1 i le vaiaso”.
O le masina nei o loo faamoemoe le afioga Muagututia ma lana ausiva e taunuu ai i Samoa mo se malologa, ona tapena ai lea mo se valaaulia i le atunuu Arapi o Dubai. O le a sailia ai ma nisi o alo talavou o le atunuu mo le ausiva.
A o iai i latou i Taiwan sa maua o latou totogi e ala i ni alauni ma o se tulaga lelei lea mo alagatupe maua a alo ma ma fanau a le atunuu o loo i totonu o le ausiva, auā o se fesoasoani mo i latou i le itu tau galuega. O alii ma tamaitai o le atunuu o loo i le ausiva e aofia ai:
Musicians: Muagututia Lose Tominiko Mulipola (Manager) – Lalovaea, Vaitoloa, Leauvaa & Manono.
Usuivao Vaioulu Tominiko Mulipola – Lalovaea, Vaitoloa, Leauvaa, Manono & Lotofaga. Pouono Silipa – Vaimoso & Lepea. Fire Dancers: Hogan Toomalatai – Puipaa & Matautu (maua lana konekarate ma o loo galue nei i le Disneyland i Hong Kong i le ailaoafi).
Falaniko Solomona – Puipaa & Aele (tulaga lua (2nd) i le tauvaga ailaoafi i Samoa ia Iuni a o lei Malaga ma le ausiva). Wayne Loleni – Tanugamanono & Laulii. Diver: (Oso maualuga mai le Afu) – Atonio Collins Tominiko – Lalovaea & Tuloto.
Faatuina e Atonio se matatia fou o le oso mai i le maualuga mo se taimi muamua talu na malaga mai nisi aufaafiafia o le Pasefika i le vaitafe e 50 mita le maualuga, maofa uma ai le aumaimoa i lea taumafaiga a lenei alo o Samoa.
O Teine: Anie Afualo – Lalovaea & Fogatuli Savaii. Mouena Collins – Fagalii, Sosefina Maifiti – Vaimoso. Elaine Betham – Levi Saleimoa. Palolo Faiumu – Lalovaea & Taga Savai. Odessa Koreti Retzlaff Curruthers – Salelologa & Aukilani NZ.
O le aumalaga e faatupeina uma mai Taiwan e le Travel & Travel Insurance, e aofia ai ma nofoaga i faletalimalo ma resorts, o taumafataga uma ma taavale faapitoa e feaveai ai le aumalaga faapea ma le $600USD i le $1000USD a le tagata i le masina.
O nisi o alo o Samoa ua manuia i ia faafiafiaga ua maua a latou konekarate i nisi o atunuu e pei o Hong Kong Disneyland ma le Disneyland a Amerika aemaise Circus tetele o le lalolagi e pei o le Circus Alegria Soleil.
