Faalauiloa tautua pese a le Samoan Assembly of God Mangere

O le siitia ma le faamaualugaina o le viiga o le Atua na taulai i ai pesepesega ma polokalame o le faalauiloaina o le tautua pese fou a le Worship Team a le ekalesia Samoan Assembly of God Mangere, e pei ona sa faataunuuina i le Aso Toonai na sei mavae atu nei.
O lenei tautua pese o se sao lea o le aufaipese faapitoa a le ekalesia aua a latou tapenaga saili tupe o loo faia, mo le tuufaatasia o se seleni ina ia toe faaleleia ai vaega uma o loo moomia mo le faili a le aulotu, aua le lagiina ma le saunia lelei o viiga o le Atua i totonu o le falesa, e le gata i tapuaiga ae faapea foi faamoemoega a le ekalesia.
Sa auai susuga i faafeagaiga mai fata faitaulaga e fia i lenei faamoemoe, ae le gata foi i lea sa faia ai foi ni sao o isi aufaipese mai lotu eseese sa faatasi atu, aua lava le lagolago i lenei foi matatia ua ausia mo le faalauteleina o le faaolataga a le Alii.
O pese o loo usu ma pueina i lenei tautua pese sa tusia lava e sui o le aufaipese a le ekalesia, ma nisi o pese sa tusia e le susuga Elika Westerlund, o se tasi o tamafanau a le aulotu.
O le susuga i le faafeagaiga ia Muavae Mika o le ekalesia Assembly of God i North Shore sa fofogaina le upu a le Atua na fai ma taualuga o le faamoemoe i le po, ma sa momoli mai ai se feau taua e le gata i le aufaipese na faalauiloaina le latou tautua pese, ae o se luitau ma se faamalosi tele foi mo le mamalu i le aofia sa auai i le po.
O le ekalesia lenei a le Samoan Assembly of God Mangere o se tasi o ekalesia na iai i uluai vaitau o le faatuina ma le taunuu mai o le Ekalesia Assembly of God i le itupa Samoa i totonu o Niu Sila nei i le tele o tausaga ua tuanai.
O le susuga i le faafeagaiga ia Ps Motu ma le faletua ia Alofi o loo tausia lenei galuega, ma o lenei tautua pese o se tasi lea o fua o a la galuega e pei ona faafale lemalu ma faatuna paulia ai i le feau ma tiute ua valaauina ai e le Atua lo la soifua.
E sefululua pese ua tuufaatasia ma pueina i lenei tautua pese, ma ua lomia i luga o CD’s e pei ona faatauina atu ai i tua i faleoloa.
O pese uma o loo pueina o loo tau atu ai le feau o le faaolataga, ae le gata i lea o viiviiga lava e faaneeneeina ai le suafa mamalu o Iesu Keriso, o ia o le Tama, le Alo ma le Agaga Paia e toatasi.