O tausaga taitasi e faia ai ni polokalame saili tupe a le autalavou a le Fetuao Youth, auā le faatupeina o nisi o a latou fuafuaga faatino.
O le tausaga la lenei, sa taulai le latou sailiga seleni, mo le fia fesoasoani e faamāmā avega i o latou mātua, auā le totogia o le aitalafu a le ekalesia sa fai e faatupe ai se lifi o loo faatū i totonu o le latou malumalu tapuai, e faigofie ai ona agai i luga tamā ma tina matutua o le aulotu, i le fogafale aluga o loo fai ai a latou sauniga lotu.
O le faamoemoe foi i lea afiafi, sa faapitoa ai o latou moomooga e toe manatua ai se tasi o uo mamae, ae o se sui foi o le latou autalavou, le alii o David Tevita Su‘a, na maliu faafuasei i se faalavelave tau taavale.
O David o se alii e lelei tele lana kuka, lea foi ua talafeagai ai le faia o le tauvaga kuka e avea ma a latou polokalame saili tupe, o se tomai sa auau i ai lenei uo mamae.
Sa vaevae le autalavou a o faagasolo le tausaga i ni vaega se lua – le vaega o alii ma le vaega o tamaitai. Ma sa tatau ona fuafua e le vaega lava ia ni auala eseese e saili ana seleni, ma le fuafuaga o le vaega e sili ona telē le latou tupe pe a faaiu galuega o le tausaga, o le vaega lena e manumalo.
Ae o le faaiuga o a latou sailiga seleni, sa faatulaga ai loa se tauvaga kuka, sa tauva ai le vaega a alii i le vaega a tamaitai. O lena tauvaga na faatautaia lava i le Fetuao Community Hall, 2-4 King Street Grey Lynn i le aso 10 o Novema, 2012.
E ta‘i 3 taumafataga sa tatau ona saunia e le vaega, amata mai lava i le faamata‘ai (an entrée), le ‘aiga autū (main course) ma le meaai suamalie (dessert) ma sa tatau ona lava e laulauina mo le to‘a 50 o tagata na totogi ai a latou taumafataga.
Sa tufa ia i latou uma na taumamafa, se fasi pepa e fai mai ai lana palota i le iuga o le afiafi, e faailoa ai poo le fea le meaai na sili ona lelei i lana taumafa, poo ai le vaega na sili ona lelei lo latou tautauina o le taumafataga, ma le vaega na sili ona matagofie lo latou teuina o le taumafataga, auā sa tofu foi le vaega ma le ‘afa o laulau na latou teuteuina.
Sa tuu foi i le faitalia a i latou na taumamafa, i le aofai o se seleni e manao le tagata e foai e fua i le lelei o le taumafataga na ia maua, ma sa tuu atu lava le foai a le tagata na taumafa, i le vaega lea sa ia palota i ai e fiafia ia latou meaai na saunia ma isi vaega na latou faatino lea sa palotaina. O le iuga o le tauvaga, na manumalo le vaega o alii.
Na atili matagofie lea afiafi i le siufofoga mālie o le tamaitai talavou ua amata foi ona iloga lona tulai mai i le taleni pese i lenei vaitau, le tamaitai pese o Cilla.
Na matuā foai foi nisi o pisinisi auā le lagolago i le faatupeina o mea sa faatino ai le faamoemoe o le autalavou. O le kamupani moa, le Tegel Ltd na latou foai pusamoa e 5; o le J.A. Russell na foai le $250, o le Ruso Construction na foai le $250.
O le lagolago autū poo le main sponsor o le Instant Finance K’rd, lea na telē la latou foai tupe sa mafai ai ona maua le aofaiga o le seleni e $2,500, faapea le Branch Manager Peter Griffin ma lana vaega Sharlene Mitchell ma Avi Kumar sa auai i le faatinoina o le tauvaga kuka, na latou foai foi le siaki tupe e $1000 mo le faamoemoe, faapea ma se microwave fou o le ituaiga 34litre Sharp, mo le umukuka a le aulotu i Grey Lynn.
E pei ona muai ta‘ua le alii talavou o David Tevita Su‘a, o se tasi o sui o lenei autalavou, ae ua motusia faafuasei le mafutaga ina ua maliu ae faato‘ā 20 ona tausaga.
E ono vaiaso o se aoaoga mo le gaseseina o meaai ma vaiinu (food and beverage internship) na auai atu ai David i Hong Kong
Na ia tuua le Southern Cross Campus i le 2009 faatasi ai ma sana sikolasipi mai le HSI e aoga ai i lea lava matata mo le 2 tausaga ma masina e 6, ma o le aso 1 o Aukuso i le tausaga nei, 2012 na faauu mai ai David i lea tomai, ae maliu i le aso 29 o lea lava masina o Aukuso. Faamaise le Atua i le aiga faanoanoa ma uo a lenei alii talavou, ae momoli foi le faamalo i le Fetuao Youth Group mo lo latou taulagalaga i mea lelei.
