Ua soona tapisa lava ma ua vavao pea tagata i fasaga o lagona ma manatu, o folafolaga ma tautinoga aemaise o le mau polomisi ua faalauiloa e pati taitasi ma ua fai ai ma mafuaaga o le lē mautonu poo fea ea le faigamalo e tatau ona talitonuina mo se lumanai manuia o tagata lautele i totonu o le atunuu nei.
O lea ua faagasolo lava faiga faalauiloa a sui tauva o Itumalo taitasi a o lumanai ai le faigapalota i le aso 20 o Setema. O le mea mautinoa o lea ua see lava le vaa o le pati ia ma galue lava le sui ia mo le faalauiloaina o lona tulai mai e fia avea ma sui tauva.
Faalauiloa le sui tauva mo Magele
O le afiafi o le Aso Toonai lea foi na faia ai se mafutaga na faalauiloa atu ai i le itumalo o Magele lo latou sui tauva le susuga ia Misa Fia Turner mo le faigamalo a le National.
Sa faatumulia ai foi la le nofoaga o le Community Hall i Magele i le paia ma le mamalu o Samoa ma isi atunuu na auai atu e fia molimauina ma faailoa la latou lagolago malosi mo le sui tauva, le susuga ia Misa Fia Turner.
Sa faapena foi ona auai atu i ai sui o le Pacific Collective auā lava le lagolagoina malosi o le mau ua taatia i malae ina ia maua ni ‘ai o le lumanai mo tagatānuu o le Pasefika.
Faalauiloa le sui tauva mo Manurewa
O le afiafi o le Aso Gafua lea na faia ai le mafutaga na faafeiloai ai le paia ma le mamalu tagatānuu o le itumalo o Manurewa ma lo latou sui tauva mo le National Party le susuga ia Simeon Brown. Tāua tele nei mafutaga o loo faagasolo ma tapenaina e le komiti faafoe ma le paia ma le mamalu o sui uma o le Pacific Collective Network auā lava le faalauiloaina o sui tauva o itumalo taitasi ma aai o loo aumau ai le toatele o tagata Pasifika i Aotearoa nei.
Pei lava ona faailoa atu pea, o se auala lelei ma le fuafuaga talafegai lelei lava lenei e faagasoloina e le mafutaga o Sootaga mo Tagata Pasifika ina ia maua pea avanoa e mafuta ai ma faatalanoaina sui tauva nei, aemaise lava o le lagolago malosi ina ia tauave ma le lototele le mau ua faataatia.
Faalauiloa le sui tauva mo Mt Roskill
O le po foi o le Aso Tofi talu ai na faalauiloa ai ma faafeiloa‘ia le sui o Mt Roskill mo le National, le tamaitai o Parmjeet, ma le mamalu o le tatou atunuu i ē na mafai ona auai atu i lea mafutaga tāua faatasi ai ma sui malolosi o le Pacific Collective Network team mai i itumalo eseese auā lava le lagolagoina o le mau tuuina atu mo se manuia o tagata Pasifika ma isi foi.
