Ua faalauiloa suafa o taulelea e toafā o loo molia i le faomea e mafua i le osofaiga na gaoia ai ni tupe se tele a le lālā o le faletupe o le Westpac i Vaitele-tai i le amataga o le masina na tea nei o Aperila.
O le Aso Gafua 26 Aperila 2010 na tutulai ai i latou ia i le Faamasinoga Maualuga e aofia ai Shane Chan Tong o Togafuafua, Faiga Victor Tanielu, ma le auuso tama o Robert ma Nasario Chong Nee o Aleisa.
O le matutua o i latou e mai le 27 e oo i le 30 tausaga. O le alii o Shane
Chan Tong ua iai lana loia, ae o le isi toatolu ua ave i ai le avanoa e faafesootai ai ni a latou loia a o nofo taofia ai pea i le vaaiga a leoleo seia oo i le aso 17 o le masina nei o Me lea o le a toe fofogaina ai o latou moliaga.
O le tasi o taulealea mai Tapatapao o loo molia foi i le mataupu lenei ona o lona talia o se vaegatupe e $1,000 tala e faapea, o se vaega o seleni na gaoia e taulelea e toafā.
O le taulealea foi lea mai Tapatapao o loo iai molimau a leoleo e faapea o ia e ana le laau malosi na faaaogā i le gaoiga o le faletupe.
O le Faamasinoga Faaitumalo o loo valaau ai lona moliaga ma ua tolopo i le aso 7 o Me se‘i faamae‘a suesuega a leoleo.
O loo faia pea suesuega a leoleo ma e tatau ona oo atu i le aso 17 o Me ua mae‘a suesuega ma faamautu moliaga uma mo i latou. Na lolofi atu le au pueata o televise i le atunuu faapea nusipepa e fia maua ata o ia taulelea, auā o se taimi muamua lava lenei ua molia ai nisi i le faia o se osofaiga e faaaogā ai ni aupega i se faletupe.
O le asō e tulai ai le isi taulealea o loo molia i lona taliaina o se vaegatupe e tasi le afe tala mai ia i latou e toafā o loo molia i le faia o le gaoiga. O lea alii mai Tapatapao o loo fai ese lona faamasinoga i le Faamasinoga Faaitumalo.
Ua toe maua se isi vaega tupe e 7 afe 590 tala mai le 243,000 tala na gaoia i le osofaiga i le lālā o le faletupe o le Westpac i Vaitele-tai i le amataga o le masina na tea nei. Na maua muamua le isi 70 afe i suesuega a leoleo ae o le faaiuga o le vaias na tea nei na maua ai i nofoaga eseese sa faatūtū i ai sailiga, le fitu afe ma ona tupu tala.
Sa faaaogā e taulelea e toafā o loo molia i le faomea, ni aupega e pei o se fana ma se sapelu e faasiilima ai le aufaigaluega o le faletupe ae fao faamalosi tupe.
O le auuso e toalua o Robert ma Nazario Chong Nee na tipoti ese ma Niu Sila ona o ni solitulafono, lea o loo iai le talitonuga o le a tuuina atu e avea ma molimau a leoleo pe a suesueina lenei mataupu.
