Na avea le malaga mai o lenei tamalii iloga o lo tatou atunuu i le taleni o le pese, le afioga ia Asuao Felise Mikaele e fai sona sao i le faamoemoe o le Kiwi Pacific Store, na ia finagalo ai e momoli mai ma se oso manaia mo nai uo, paaga ma i latou uma e fiafia i ana pesepesega o i Melepone.
O taimi uma e malaga asiasi ai Asuao i le aai o Melepone, o le auaunaga lava a le Kiwi Pacific e latou te fesilafai ma faataunuu ai ona faamoemoe, o lona foi lea finagalo na saunoa i ai, o se avanoa faaauro lea e faalauiloa ai ma faatau atu mo le uluai taimi lana ata pese fou lea faatoa mae‘a tapenaina, le “Faailo o le faaolataga”.
Na maitauina le taupati atu o le atunuu e silasila ma faatau le ata pese, o lenei ata o le tuufatasia o nisi o ana faafiafiaga, faatasi ai ma se feau tau momoli faaleagaga. O Asuao o se uo mamae a tagata Melepone, toatele i latou e fiafia i ana fatuga mai lava i tuaa sinasina e oo lava i fanau. Sa maua ni taimi na malaga ai ma Asuao e faalauiloa ma molimoli le tatou pepa i faleoloa i Melepone, na maitauina ai le taupati ane o le paia ma le mamalu o le atunuu e fia pue ni ata ma Asuao, o le ala foi lea e talitonu ai la tatou tautua, ua talafeagai le finagalo o Asuao, e sii maualuga Melepone e ala i le tatala muamua ai o lana ata pese. O le Kiwi Pacific i Braodmeadows ma Laverton o loo mafai ona maua i ai lenei ata pese a le afioga Asuao Felise Mikaele.
