Sa maua se avanoa o le alii faasalalau, le susuga Terry Filimaea Fauea, e faatalatalanoa ai le afioga ia Sualauvi Pule Sua Tuiavii, e tusa ai ma lana uluai CD pese ua amata faalauiloa nei.
O lea faatalanoaga sa faia i luga o le alaleo faasalalau o le Penina o Asuisui i le po o le Aso Sa, aso 5 o Fepuari.
O le afioga ia Sualauvi Pule Sua Tuiavii, o ona alalafaga e iloa ai i Samoa o lona tina o le Nofoalii, Fasitootai & Leulumoega, a o si ona tamā e maliu mai i le alalafaga o Satuimalufilufi.
Na tatala aloaia lana uluai CD i le aai o Sini i le masina o Aperila 2011, ma ua a‘e se tofa e auina mai i Kuiniselani auā foi le silafia e nisi o uo ma paaga masani faapea tagata o nai ona alalafaga.
O pese uma e 9 o i totonu o lenei CD na tusia uma e le afioga ia Sualauvi Pule Sua Tuiavii.
O le igoa ua faaigoaina ai ana fatuga muamua “Fai ma Soo Moni o Iesu”.
O se tamā e toaga tele i le lotu, o le ala lea ua tatau ai ma onomea ona faateleina viiviiga o lo tatou Atua auā o Ia o le Tupu o Tupu ma Alii o Alii.
O le afioga ia Sualauvi Pule Sua Tuiavii o loo aumau nei i le Setete o Niu Sa Uelese. Mo aiga uma lava e fia manaomia ni CD e mafai ona faafesootai ane a tatou faleoloa masani pe faafesootai mai le numera 0430 879 329.
