Tusia: Merita Huch
Samoa
O le faafofoga i le tele o matai e lē o malamalama i faalupega o le atunuu ma ua soloatoa le faaaogāina o fuaitau ma alagaupu faa-Samoa, o se tasi lea o popolega tele ua manatu le Minisita o Mataupu tau Tina ma Tamaitai, Atina‘e o Nuu ma Aga Fesootai, ua talafeagai tonu ai lava le faalauiloaina o le Tusi o Faalupega a le Malo lea ua fuafua e faataunuu a o lei mae‘a lenei tausaga.
I se faatalatalanoaga i se taimi ua mavae ma le afioga ia Tolofuaivalelei Falemoe Leiataua, na ia faaalia ai e ofo le loto i nisi o faleupolu i atunuu i fafo ma Samoa lava foi latou, i le faaaogāina o le gagana a le atunuu.
O le soloatoa o le faaaogāina o fuaitau ma alagaupu ua ia manatu sa tatau lava ona matuā sailiili lelei i ai faato‘ā mafai ai ona faaaogā i lauga ma felafolafoaiga a le atunuu.
“O nisi ua matuā leiloa lava faalupega ae ua faaaogā lava soo se fuaitau a o se alagaupu ua tau ane ai”.
O se malaga na auai atu ai le alii Minisita ma le Taitai o le Malo le Alii Palemia i Ausetalia faapea foi ni asiasiga i Niu Sila na maua ai loa ma le avanoa e fofogaina ai ia popolega o le Alii Minisita ma na valaaulia ai lava foi e faatautaia ni aoaoga ae o ni faatalatalanoaga foi i atunuu mamao ina ia fesoasoani ai i le toatele o le atunuu e lē o malamalama i le faaaogāina o le gagana faafaleupolu.
O le aogā lea o le tusi faalupega fou lea ua tuufaatasia i lalo o le faamalumaluga ma fautuga a le Faafaleula a le atunuu lea ua sauni e faalauiloa i lenei tausaga. O le tele o mataupu na laga faatatau i suiga o le Tusi Faalupega tuai ua iloiloma ua mae‘a soalaupule ma sa faaalia e le alii Minisita o faamaumauga uma lava ua faaaogā i le tusi faalupega a le Malo e leai se faamatalaga e faia e aunoa ma le maliega atoatoa ua iai a afioaga ma sui o le Malo ia ua fesootai ma le faa-Faleula poo le Matagaluega ina ia mautinoa e lē toe alia‘e mai ni feeseeseaiga ona o le Tusi o Faalupega.
O le faamoemoe o le Matagaluega e lē gata ina soo Samoa i le tusi lenei ae ia mafai foi ona agai i tagata Samoa i atunuu mamao lenei tusi faalupega ma o loo iai le manaoga ia aogā foi i fanau laiti.
Ua iai le faamoemoe e tatau ona faamalieina le toatele o le atunuu aemaise lava i faleupolu i lenei tusi ma o le a faapea ona faaaogāina e tupulaga i aoaoga aemaise i latou o loo aumau i fafo.
Ua tele tusi faalupega ua lomia ma o le tusi lenei o le a faapea foi ona aofia ai ma malae poo maota o afiaoga aemaise isi suafa faasino i afioaga eseese.
