I Samoa lava ia ua latalata i le to‘a 130 fanau mai le matua ua na o ni nai masina i le 35 tausaga le matua, ua aafia o latou fai‘ai (se‘i tulou) ma ua lē mafai ai ona atoatoa le soifua aemaise le aafia ai o musele o le tino. O le gasegase lea e ta‘ua i le faapapalagi o le Cerebal Pausy poo le CP i le faapuupuu.
E leiloa e le Loto Taumafai poo le tulaga ua iai nei ua toatele le fanau ua maua ai ona o le suiga o le soifuaga i lenei vaitaimi ma faatuputupulaia o le numera o tagatānuu o Samoa, pe mafua mai ona o lea faato‘ā faalauiloa lenei polokalame ua agai ai le Loto Taumafai i afioaga taitasi auā le fesoasoani ai i le tausiga o nei fanau.
O lea faato‘ā faatautaia ai ma ni faamaumauga o nei fanau. O le vaiaso la lenei ua amata ai se polokalame tau televise faapitoa – auā le faamalamalama atili ai o lenei gasegase.
“O uluai polokalame e lua ua vaavaai ai lava i le faamalamalamaga o auga o lenei gasegase o le CP, o mafuaaga e maua ai fanau i le gasegase ma auala e taofia ai le ono maua ai o se isi o le fanau,” o se faamatalaga lea a le tamaitai na pueina ma tuufaatasia lenei polokalame mo le faasalalauina i le televise o Ronette Van Hypswick.
Ta‘ua e Ronette o le tausaga atoa na galue ai i le pueina ma le tuufaatasia o lenei ata ma ua mautinoa ai i suesuega ma le faatalanoa ai o fomai, o i latou e iai le tomai e fesoasoani ai i ē ua maua i le CP faapea mātua ma aiga o nei fanau, le tāua tele o le vaai faalelei e le tina ma‘itaga o lona tino ma lona soifua maloloina.
“E tolu lava auala ia ua faamaonia nei e mafua ai ona maua se tamaititi i le Cerebal Pausy, poo le pe o le faia‘i se‘i tulou, muamua e ono aafia le tina i lana maitaga, pe pa‘ū pe ua iai foi se faaletonu i lona ma‘i. O le lona lua o le taimi ua fanau mai ai le pepe fou e ono iai ni faaletonu aemaise ae e lei atoa masina e tatau ona tauave ai le pepe ma le lona tolu o uluai masina o pepe i lona fanau mai e tatau lava ona vaai faalelei ma faaeteete nei pa‘ū auā e faigofie ona aafia ai lona ulu poo lona faiai. E iai isi mafuaaga peitai o le tolu lava lea e tatau ona mataala i ai tamaitai maitaga.”
O le galuega a le Loto Taumafai o loo fai nei o le agai o ona sui e tusa ma le to‘a 20 ua a‘oa‘oina e fesoasoani i fanau ua maua i le CP auā faamalosi tino ma a‘oa‘oga o mātua ma i latou ua tausia ia fanau. I nei asiasiga, na ta‘ua ai e le tamaitai fai polokalame na maua ai foi ma se isi tulaga faigata.
“E toatele lava isi mātua e mamā i fanau nei pe afai ua vaaia ai tulaga faaletonu nei.
O le toatele o nei fanau ua vaetama atu i nisi tagata, a lē o aiga o mātua e ana fanau o nisi lava tagata ese ua lagona le alofa i nei fanau ma o le toatele o fanau nei a le lelei lava le tausiga ma le malamalama tagata i auala e tausi ai, e lē umi lava lo latou ola,” o se faaaliga lea a Ronette.
O le faaaliga a nisi o loo faia le galuega tele o le asiasia o fanau ma faamautu a latou faamalosi tino, o le toatele o fanau e mafua le maliliu ona o le taimi e fafaga ai o loo faataooto. O le mafuaaga lea o le sao o le vai poo le meaai palu i le māmā ma e tele ina malemo ai māmā o le fanau ae e mafua mai i le lē malamalama o aiga i le fafagaina o le fanau.
“A tou silasila i le faitau selau e maliliu i atunuu e pei o Amerika ona o le sese o togafitiga ma le tausiga, ona iloa ai lea iinā le matautia o le tulaga e iai le ola o le fanau lenei pe afai e lē malamalama aiga i lo latou tausiga,” o se faaaliga lea a le Alii Palemia i le sauniga na faalauiloa ai mo le uluai taimi lenei polokalame.
“O le fautuaga lava i tina ina ia vaai faalelei lou soifua maloloina, tausi lelei i le fanau ma ia mautinoa e iloa le faatinoga o le tausiga o le fanau”. O le matautia o lenei gasegase o le leai o se togafiti e mafai ona fai i ai, se‘i vaganā tui ma vai i taimi e oso ai faama‘i malosi nisi o ma‘i o le fanau. E tele foi suiga i totonu o aiga ma e aafia uma lava tagata o se aiga pe afai e maua ai se tamaititi i le gasegase lenei.
O se gasegase ua ta‘ua i lenei polokalame e matuā moomia ai le alofa faamaoni o mātua, le onosai ma le faapalepale aemaise le finagalo malamalama i ona faigata. Ua fesoasoani le Malo ma nisi faalapotopotoga i le Loto Taumafai ma o le Malo o Ausetalia lea na fesoasoani e totogi le seleni e tuufaatasia ai lenei polokalame o le a faagasolo nei mo vaiaso e 10 i luga o le TVONE auā lava le taumafai e momoli atu le feau tāua i le puipuiga ma le tausiga o fanau ua maua i le CP.
“Ia sui finagalo o le atunuu i lenei gasegase ma ia maua le alofa e tausi ai i fanau. O le tagata aupito matua o loo soifua pea a o loo maua i le CP e 35 tausaga le matua ma e nofo lea alii i Savaii, atonu o le lelei lava o le tausiga ua umi ai lona soifua,” o se faamatalaga lea a Ronette.
E mae‘a polokalame o le faamalamalama ai o le CP ona sosoo loa lea ma polokalame ua patino lava i nisi o le fanau ua filifilia e mulimulitai lo latou soifua ai i totonu o le aiga ma nisi vaega o le atunuu ua laasia le ofi atu i ai ina ia maua le fesootaiga ma isi tagata ma maua ai se isi faamalosiau i mātua o loo nafa ma lenei galuega o le tausiga o fanau ua faaletonu o latou mafaufau.
