O le tala faatino ua faaigoaina My Penina, o se tala sa tusia e le tamaitai o Fiona Collins, ua fuafuaina o le a mafai ona tatalaina mo maimoaga a le atunuu ma tagata lautele i le vaiaso muamua o le masina fou o Aukuso.
O le tala o le a faatinoina lava e nisi o alii ma tamaitai Samoa, ma e iai vaega o lea tala e faaaogāina ai le gagana a le atunuu.
O loo iai foi ma ni pese o loo faaaogāina ai i le taimi e faatino ai le faamoemoe.
O le ata o le a faatinoina e faatatau lea i le faamanatuina o le 50 tausaga talu ona faaipoipo le tamaitai o Aniva ma le alii o Pelenato. E telē se feau o loo iai i totonu o lea foi taumafaiga a tamafau a le atunuu.
E manatu o se ata lelei e toe faatepa i ai i le agai mai o le talutalufou ma le laumea toenuti i lenei foi vaitau ma suiga o le soifuaga, ma le feagai ai ma tupulaga faigata.
E 75 minute le umi o le ata poo le tala faatino e aofia ai ma nai siva ma pese o le a teuteu ai lea foi faamoemoe.
O se vaega o le poloketi poo fuafuaga a le kamupani ua faaigoaina o le Pacific Dance, o loo taiulu i se tasi foi o alo o le atunuu le susuga ia Iosefa Enari.
O le tala faatino “My Penina”, o loo faatonutonu e le susuga ia Anapela Polotaivao, ae o gaioiga uma o loo faatinoina e Aleni Tufuga, Iaheto Ah Hi, ma le tamaitai o Fiona Collins.
O le Aso Gafua o le aso 2 o Aukuso ua faamoemoe o le a faaali ai mo le taimi muamua lea tala, ma o le vaiaso atoa seia oo i le aso 7 o le masina lava lea o le faaauau ai pea lona faatinoina.
O le a tatala foi le avanoa mo soo se tagata e fia auai mo le maimoaina o lenei tala faatino.
E pei ona faamaonia mai e le tamaitai ia Filoi Vailaau, o le pule o poloketi a le Pacific Dance, e faapea e $25 le ulufale mo tagata matutua. O le nofoaga o le Herald Theatre o le a faaalia ai faaaliga uma o le vaiaso e pei ona fuafuaina.
E tele nisi vaega o loo tuufaatasia e le vaega a le Pacific Dance, ma o loo iai le faamoemoe o le a mafai ona faalauiloaina faalauaitele i se taimi lata mai.
A o se feiloaiga ma le tamaitai o Filoi sa ia ta‘ua ai, le tele o isi tulaga tāua o loo taumafai i ai ma le susuga i le alii pule ia Iosefa Enari, e aofia ai le taumafai e a‘oa‘oina tamaitai muli o le atunuu, mo le siva Samoa aemaise ai foi isi atunuu ia latou foi siva.
