Faalauiloa le taaloga o le tag a Samoa i Aukilani

Komiti faafoe o le taaloga o le tag i Samoa
Komiti faafoe o le taaloga o le tag i Samoa

O le taaloga lenei o le tag na faia i le 20 tausaga talu ai, o se taaloga e aofia ai soo se matua o tausaga o tagata, e faailoa ai lo latou tomai i lea taaloga, e aofia ai tagata faigaluega, fanau aoga ma soo se tagata lava. O le taaloga e taua tele lea i le faamalosia o le soifua maloloina lelei o tagata, e fesootai lelei foi ma isi taaloga e pei o le lakapi ma le liki.

O le tausaga 2017 na faatuina ai pe sa faavaeina ai le Samoa Tag Incorporated i Samoa, i lo latou faamoemoe maualuga, o se tasi lenei o taaloga e sili ona taua i totonu o Samoa, e faailoa ai le tomai o fanau aoga, ae mafai ai foi ona unaia tagata uma e fiafia i lenei taaloga e siitia le tulaga lelei o le Tag i tausaga uma, aemaise ai o le faaleleia o se siosiomaga soifua maloloina lelei ma le fiafia e mafai ai e tagata taaalo ona aoaoina ni tomai fou ao faagasolo le taaloga.

O le Samoa Tag Incorporated ua resitala aloaia nei i lalo o le faamalumaluga o le asosi faatina o taaloga le SASNOC (Samoa Association of Sport and National Olympic Committee) i le taitaiga a le afioga ia Tuala Mathew Vaea. Ua faamoemoe foi le komiti filifilia o le Tag Samoa e faavaeina se au Tag a Samoa i atunuu i fafo ina ia mafai ona faasoa atu lo latou tomai i lea taaloga i totonu o Samoa ma avea foi lenei au i atunuu i fafo ma au a le atunuu o Samoa.

O le afiafi o le aso Tofi na aloaia ai le faalauiloaina o le Samoa Tag i Aukilani e pei ona malaga mai ai le afioga ia Tuala Mathew Vaea o le CEO lea o le asosi faatina o taaloga i Samoa, faapea le peresetene ia Faaofonuu Junior Leota, Fiu Ronnie Nili o le sui peresetene ma nisi o le komiti faafoe o le Samoa Tag i Samoa. O lea faamoemoe sa faataunuuina lea i le maota o Samoa i Magele.

O le sini autu na ave iai le faamuamua o lea faatalatalanoaga, o le taumafai lea o le Tag Samoa, ia vaavaai uma au taalo o le Tag i totonu o Niu Sila ma isi atunuu o loo latou faaaogaina le igoa o Samoa i lea taaloga, e tatau ona ui atu e resitala uma i lalo o le faamalumaluga o le asosi o faatina i Samoa le SASNOC ona mafai lea ona taaalo i ia atunuu mo le igoa o Samoa. Ua faailoa foi e le afioga i le peresetene ia Faaofonuu Junior Leota, o le aso 5 ma le aso 6 o Setema ua iai le fuafuaga o le Samoa Tag e faagasolo ai le taamilosaga o le taaloga o le Tag i Samoa i le vaitaimi o le Teuila.

Ma o le taimi muamua lenei ua faatinoina ai lea taamilosaga i Samoa. E silia i le 30 au na ta’ua e le afioga i le peresetene o le a mafai ona auai, e aofia ai au e 20 i Samoa, 10 Ausetalia ma le 10 i Niu Sila nei. O loo iai foi le au a alii leoleo i Aukilani nei lea ua iai le faamoemoe e auai atu ai i lea taamilosaga. O loo tatala le avanoa i soo se au, o loo tatala foi i soo se matua o tausaga e fia taaalo. O le taua o le malaga atu o au i atunuu i fafo i le taamilosaga o le Teuila, o le a mafai ona faasoa ma fetufaai ai le iloa ma le malamalama o tagata taalo i Samoa ma atunuu i fafo e uiga i lenei taaloga. E le gata i le penifiti o tatou au taaalo i Samoa, ae e iai le talitonuga o le komiti o le tasi lenei taaloga e ono siitia le igoa o Samoa i le lalolagi.

O le tofa mamao o le komiti o le taaloga o le Tag i Samoa, ia faaauauina pea lea taamilosaga i tausaga taitasi, ina ia mafai ona atinae ai fanau aoga ma nisi o tagata matutua e fiafia i lea taaloga, aemaise ai ia fesoasoani foi le taaloga i le atinaeina o le tamaoaiga o le tatou atunuu.