A toe tomanatu i tuaa ma aso anamua i tala na tuutaliga mai ma tusitusiga tuufaasolo, ona mautinoa ai lea o le siapo o le laei Samoa moni, sa laei ai tuaa i le tele o tausaga ua tea. Sa fai ma matafaioi a tina ma tamaitai le gaosiina o siapo mai le luau‘a. Peitai ua mou atu ma ua lē toe faalogoina pe vaaia lona gaosiina, ae a tepa i nai o tatou uso tuaoi i le motu i Toga, o le matafaioi tauave lea a tina ma tamaitai, ma o loo latou laeiina pea lava foi, o se tasi o a latou tu ma agaifanua, o fea lava foi e nopiai ma papaaao ai, e iloa lava Toga i lo latou laei lea.
O le afiafi o le AsoTofi o le vaiaso na tea nei, aso 2 o Aokuso, na tatala aloaia ai ma faalauiloa i le nofoaga o tusiga ata ma galuega taulima i Melepone (Melbourne Craft) le siapo e 20 mita lona umi, ua faaigoaina o le Siapo Melepone poo le Melbourne Tapa.
O le siapo lenei na aumai mai Toga, ona vaevae lea i vaega e sefulu ma le tolu, o le aofai lea o tina ma tamaitai o le Fafine Pasefika e pei ona faaigoaina ai le asosi a nai tina ia mai atumotu o le Pasefika e pei o Toga, Fiti, Samoa ma Aotearoa.
E silia ma le sefulu masina o galulue tina nei e vali ma faamamanuina lana ia lava vaega o le siapo, i mamanu a lona lava atunuu, faatasi ai ma ata, e faalauiloa ai le talaaga o lona soifua, seia oo ina malaga saili malo mai i Ausetalia. E uigaese le matagofie ma le felanulanuai o le tuufatasiina o ata, aemaise o mamanu e nai tina.
O le tina ia Aliitasi T. Trood o Falelatai ma Solosolo, faatasi ma nai ona alo o Frances Masina Trood, Lana Lalagofaatasi Sila Laasia, ma Margaret Pulepule, sa fai ma sui o Samoa, faatasi ai ma le tamaitai o Frances Maaria Tua o le Maori ae maupaolo i le Samoa, lea na ia faaaogāina mamanu Maori ma Samoa.
Na faaalia e Aliitasi, e lei faigofie le galuega aemaise o mamanu, peitai sa tuu atoa i ai o latou finagalo ma taimi ina ia faalauiloa taleni ma meaalofa o loo i o latou soifua, aemaise foi o le igoa o si o latou atunuu pele o Samoa.
O le purinisese o le malo o Toga, o Angelika Latufuipeka Halaevalu, sa fai ma malo faaaloalogia o le afiafi, ae na taualuga i sausaunoaga faa-Samoa a Aliitasi ma nai tina Samoa, faatasi ai ma le susuga i le faafeagaiga taulagi ia Samani o le EFKS i St Albans.
O loo tatala nei le Craft mo maimoaga i le Siapo Melepone, seia oo i le aso muamua o Setema, ona masii ai lea i le Art Gallery a Melepone, lea ua latou faatauina i le fasefulu afe tala, o inā o le a tautau tumau ai lenei matatia fou, e pei ona ausia e nai nei tina Pasefika. Ae mafai ona e silasila i le atoatoa o le siapo 20 mita ma ona mamanu eseese i luga o le internet i le Melbourne Tapa.
