Na molimauina le laei e le toatele o tina ma tamaitai o le lanu piniki i totonu o le aai o Porirua i le Aso Toonai na mavae atu nei, e faatāua ai se polokalame fou ua faaigoaina o le Pinikilicious. O se polokalame e aloaia ai le itu tau soifua laulelei ma le soifua maloloina o tina ma tamaitai Pasefika.
O lenei polokalame o se tofamamao na a‘e e le komiti faafoe o le Pinikilicious e aofia ai ma faletua i totonu o le Mafutaga Ekalesia Soofaatasi Porirua ina ia faaolaola lenei polokalame auā le tuleia o tina ma tamaitai Pasefika, ia fai o latou siaki tau le soifua maloloina, ma vave foia ma togafitia ai o latou ma‘i, a o lei oo atu i se aafiaga o o latou soifua.
Na saunoa le taitai o le Pinikilicious o Caroline Mareko e faapea, o loo itiiti pea le fuainumera o pasene o tina ma tamaitai Pasefika o loo faia siaki i tausaga uma.
O le ala lea o le unaia o lenei polokalame auā o loo telē pea le aafiaga o tina Pasefika o loo maliliu i le ma‘i kanesa o le susu, pe a faatusa i tina ma tamaitai papalagi ma isi atunuu.
Na vaaia i lea aso le auai atu o nisi o sui o faalapotopotoga mai le soifua maloloina faapea tau aoaoga, o kamupani, sosaiete, aiga ma sui o Ekalesia eseese auā le lagolagoina o lenei polokalame aemaise le faatāuaina o tiute tauave faapea le sao o tina ma tamaitai Pasefika totonu o komiuniti ma Ekalesia i Porirua. Sa tatala aloaia le aso i se sauniga faapitoa i le hall a le EFKS Porirua i Waitangirua. Na sosoo ai lea ma faamatalaga ma auiliiliga o mataupu mo le fesoasoani tele i tina ma tamaitai Pasefika, ia silafia le tāua o le faatinoina o le faia o le siaki o o latou susu (se‘i tulou), vaaia o fomai, faasoa ina ia fai se fa‘ata, aemaise lava mo tina ma tamaitai ua sili atu ma le 40 tausaga o latou soifua.
Sa faapupula atili e le taitai o le Pinikilicious, o Caroline Mareko le faamoemoe ma le aano tonu o le aso, ina ia faatino soo se gaioiga e avatu ai se tausiga faapelepele i tina uma ma tamaitai e pele i o tatou olaga.
E tele isi meafai na faatino i lea lava aso, e pei o le faataitaia o le auala e gasese pe kuka ai taumafa e aogā mo lo tatou soifua maloloina, o le aoaoina o le lalagaina o mea taulima, faapea le fatuina ma le faatulagaga o teufugalaau matagofie, le faamanaiaina o fofoga i le faaaogāina o vali ma kulimi e aogā mo le tino ma polokalame eseese mo le ola maloloina. Na fai foi le Zumba auā le faamalositino, aemaise foi o ni tautalaga poo lauga e faagaeetia lagona na folasia e tina matuatua ma faletua o Ekalesia.
I le tele o finagalo faaalia o nisi sa auai i lea aso na molimauina ai le matagofie o lenei polokalame i ona tapenaga ma le faamaopoopoina, e mautinoa ai o se polokalame sa ausia tonu le fuafuaga ma le autū ola laulelei ma le soifua maloloina o tina ma tamaitai.
Na saunoa le faletua ia Penina Vailaau, o le sui o le Mafutaga Ekalesia Soofaatasi Porirua mai le Ekalesia Faapotopotoga Kerisiano Samoa i Waitangirua e faapea, o le auga o lenei polokalame o le unaia malosi lea o tina ma tamaitai e ala i le toaaga e faia faamalositino ma faagaioia le tino i feau a le aiga, aemaise ia taumamafa i meaai e maua ai le malosi ma le soifua maloloina.
Sa ia faamalo i le komiti o le Pinikilicious mo le aso matagofie aemaise foi auaunaga aogā mo le komiuniti o Porirua ma Ekalesia.
E ova atu ma le 200 le mamalu o le atunuu na auai atu e sapaia le faamoemoe, e pei ona faasafua mai ai le valaaulia i soo se tamaitai ma soo se tina, ina ia afifio atu e talia lelei nei faamanuiaga mo latou.
O le manatu o le komiti o le Pinikilicious ina ia maua se aso e amanaia ai le tulaga o le soifua maloloina o tina ma tamaitai ma faatalatalanoa ai aafiaga ma togafitiga o le faamai kanesa, o se fesoasoani tāua tele mo le puipuia o le soifua ia manuia ma maloloina lelei.
Ua vaavaai nei le komiti i le tausaga a sau e faalauteleina ai lenei polokalame i totonu o Porirua ma aai lata ane.
E momoli ai le faafetai faapitoa i tina ma tamaitai uma sa auai aemaise le komiti mo tapenaga faapea faletua mai le Mafutaga Ekalesia Soofaatasi Porirua, aemaise le Capital Coast District Health Board (CCDHB), Susuga Holona Lui ma le faletua o le Catalyst Pacific, Susuga Afamasaga Tealu Moresi ma le aufaigaluega o le Fofoga o le laumua le Samoa Capital Radio mo le latou lagolagosua.
O le taumafaiga a le Pinikilicious ua faamaonia ai upu e fai a Samoa, “E au lava le inailau a tina ma tamaitai i soo se matata i le faaletino ma le faaleagaga”.
