Faalauiloa le DVD

O lenei ata tifaga na amata afuafua mai i le tausaga e 2007, o le taimi foi lea e lei mautinoa pe mafai ona pue ni ata tifaga Samoa auā e lei iai se ata ua pueina muamua. O se saunoaga lea a le susuga ia Vili Ieru, e tusa ai ma le amataga mai o lenei tautua e pei ona ua tino mai nei.
Saunoa Vili, o le tausaga tonu lava lea sa ia tusia ai le pese “Toe foi le tama Savaii”, lea na usuina e Mautoatasi Asuao. A o tusia lenei pese na tupu ai lava se manatu ia te ia e iai se aso pe a tusa ai ma le finagalo o le Atua, o le a faataunuu ai lana miti lea ina ia pueina se ata tifaga ma faaigoaina “Toe fo‘i le tama Savaii.” E tele foi ni taimi sa faasoa ai Vili i le tina o le aiga e uiga lava i lenei ata tifaga, ina ua faatoa uma ona tusia lenei pese i le 2007.
O le mafuaaga foi o lenei pese ma le ata tifaga e pei ona saunoa Vili, o se manatu sa tupu ane a o tuputupu ane, sa ia vaaia ai le soona fai o nai faiava ma fafine nofotane i totonu o aiga Samoa, ma na ia manatu ai e lē tutusa ma le tala lelei.
O loo silafia uma e le atunuu lea tulaga, o le mafuaaga lena na tupu ai lava se manatu lea na faailoa i le pese ma lenei ata tifaga.
O loo autū lenei ata i se taulealea mai Savaii na faaipoipo atu i se tamaitai mai Upolu ma ia iloa ai le faigata o le olaga o se faiava. A o le mea tonu lava lea na fefe tele i ai a o laitiiti ae o lea ua toe iu lava i ai.
O Samoa afai e te poto ma maua sau galuega lelei, e fai lelei lava Oe e le aiga o lou toalua, ae afai e leai sau galuega e te nofo i le aiga o lona uiga e te faia uma lava feau a le aiga o lou toalua. E lua vaega o lenei ata ma e faamoemoe o le tausaga fou e sau ai i tua le Vaega 2.
Molimau le susuga Vili i le taupati atu o le mamalu o le atunuu e faatau mai le ata Tifaga “Toe fo‘i le Tama Savaii” ma e momoli atu foi lana faafetai i le atunuu i le lagolago atu i lenei faamoemoe, ma ua matuā tele ata ua faatauina atu.
O se taimi o lenei vaiaso ona faatoa oo atu lea i Ausetalia, Ueligitone, Samoa & Amerika Samoa. E momoli foi le faafetai tele a Vili i feau tusitusia i luga o telefoni ma le toatele o loo telefoni atu ma faaalia le agaga faafetai i lenei taumafaiga.
Mo i latou o loo fesili pea i se Vaega lona lua o le ata, Lupe na Fofoa i Vaoese, o le a leai se vaega lua ona o le Tala moni lava (True Story), ma e lē mafai ona faaopoopo i ai se isi mea.
Faatau loa se ata “Toe fo‘i le tama Savaii e te talitonu ai. O le tuualalo mai a le susuga Vili, e moomia lava ona faatau sau lava ata, o lou foi lena lagolago i le vave ona toe maua mai o le isi ata fou, nai lo le fiafia o tatou e fai lenei mea o le borrow ma matamata fua mai ata a isi, auā e iu ina lē maua ai foi se tupe e toe fai ai isi a tatou ata.
Mo nisi faamatalaga, e mafai ona faafesootai Vili Leilua Ieru i le telefoni 021-1427234, poo le imeli: visioncd@xtra.co.nz