“O le 54% pasene o tina ma tamaitai Pasefika, e telē le aafiaga e ono maliliu ai mai le kanesa o le susu, pe a faatusa i tina ma tamaitai papalagi”. O se faamaumauga lea a Matagaluega mo le Soifua Maloloina i Niu Sila.
O se ata DVD fou ua faaigoaina ‘LOVE, FAITH, HOPE’, na tatala aloaia e le faapotopotoga autū a Niu Sila mo le kanesa o le susu (tulou), le ‘NZ Breast Cancer Foundation’, na faalauiloaina i le Aso Faraile na tea nei, i se sauniga faapitoa i Otahuhu, Aukilani, lea na auai ai le toatele o tina ma tamaitai o loo galulue mo faalapotopotoga patino i le soifua maloloina.
O lea ata o loo faamatalaina ma auiliiliina ai mataupu mo le fesoasoani tele i tina ma tamaitai Pasefika, ia silafia le tāua o le faatinoina o le faia o le siaki o o latou susu, vaaia o le fomai, ia fai le fa‘ata, aemaise lava mo tina ma tamaitai ua sili atu ma le 40 tausaga o latou soifua. O se galuega fai faatasi a le NZBCF ma faalapotopotoga e pei o le Breastscreen Counties Manukau, Breastscreen Auckland, Ministry of Health, West Fono ma le Health Star Pacific, le tuufaatasiina o le ata, ae na faatupeina e le NZBCF.
E faaperetania le ata DVD, ae o loo faaopoopo i ai nisi o vaega o loo faa-Samoaina mo le silafia e le atunuu.
O loo iai ni faatalatalanoaga mai nisi o tina sa aafia ma latou uia togafitiga o le faama‘i kanesa, o se fesoasoani tāua tele mo le puipuia o le soifua ia manuia ma maloloina lelei.
I se pepa o faamatalaga o loo tusia ai e faapea, o le kanesa o le susu, e pito sili ona maualuga lona aafiaga i tamaitai ma tina i Niu Sila. E silia ma le 2,800 i le tausaga i latou o loo lipotia e aafia i lea faama‘i.
Ae o se tala fiafia, o loo tau faaitiitia lea fuainumera, ona o le filigā o tina ma tamaitai, ia fai a latou siaki, ma vave foia ai ma togafiti ai o latou ma‘i, a o lei oo atu i se aafiaga o latou soifua.
Afai o loo fia maua se kopi o lea ata, e leai se totogi, faafesootai Patricia Field, i le 09 3041223 pe imeli patriciaf@nzbf.org.nz.
